Белгілі продюсер Баян Алагөзова әйгілі "Қыз Жібек" фильмінде басты рөлді сомдаған Меруерт Өтекешеваға өмірінің соңына дейін ай сайын 1 млн теңгеден төлеп отыратынын мәлімдеген еді. Енді продюсер бұл уәдесінен бөлек, актрисаға пәтер тарту ететінін айтып, Меруерт Өтекешевамен жеке жүздесті, деп хабарлайды KAZ.NUR.KZ.

Продюсер актрисамен кездескен сәтінен видеоны Instagram желісіндегі парақшасында жария етті.

"Сіздің жылағаныңызды қаламаймын, қуанғаныңызды қалаймын. Тағы да қайталап айтамын: сізге тең келер адам жоқ және болмайды да. Мен сізге пәтер сыйлағым келеді. Өзіңіз қалайтын пәтерді, қалаған ауданнан... Өйткені мен мұны естідім... Бұл рас па, өтірік пе, білмеймін?", — деді Алагөзова көзіне жас алған Меруерт Өтекешеваға.

"Бұл — шындық", — деп жауап қатты Өтекешева.

Продюсер актрисаға екі айдың ішінде пәтер сыйға тартпақ екенін айтты.

"Мен сізге уәде беремін, екі айдың ішінде біз пәтер таңдаймыз, қай ауданнан пәтер керегін айтасыз. Сіз ең керемет жағдайда өмір сүруіңіз керек. Білесіз бе, сіз әрқашан маған сенім арта аласыз. Кез келген мәселе бойынша. Меруерт апа, мен сізді қатты жақсы көремін. Сізді бірінші рет көріп тұрмын, бірақ мен сізге әрқашан тәнті болатынмын. Бұл шындық. Құдай бәрін көріп тұр. Камзол маған тегіннен-тегін келген жоқ. Сондықтан мұны менің алғысым ретінде қабыл алыңыз. Бақытты болыңызшы. Сізде бәрі жақсы болсын, өтінемін. Жыламаңызшы, тек қуаныштан ғана көзіңізге жас алсаңыз", — деді Баян.

Меруерт Өтекешева болса, алғыс айтуға сөз таба алмай тұрғанын жасырмады.

"Сіз маған еш қарыздар емессіз. Жағдайыңыз жақсы болуы үшін бәрін жасау — біздің міндетіміз, біздің жауапкершілігіміз. Рахмет. Рая Төкенқызының бұл қамзолды маған беруі де тегін емес деп ойлаймын. Рая Төкенқызы оны күтіп ұстаған. Оны қалай тазалау керектігін, барлық технологиясын білгендіктен, үнемі тазалап отырған. Оны ешкімге бермей сақтаған, өйткені ол есептен шығарылған дүние еді. Ешкімнің шаруасы болмаған. Енді онымен не істеу керек екенін тек сіз шешесіз", — деді Баян Алагөзова.

"Осы фильмді түсірген адамдардың естелігін сақтағым келеді. Фильмге қатыстының бәрі — Сұлтан ағаның (Сұлтанахмет Қожықов, режиссёр) арқасында", — деп жауап қатты бұл сауалына Меруерт Өтекешева.

Актриса Баян Алагөзоваға алғыс ретінде аққу кейпіндегі кәдесыйды тарту етті. Продюсер бұл сыйлықты камзол секілді сақтап қоятынын жасырмады.

Меруерт Өтекешева Батыс Қазақстанның қыздары рухты екенін сөз етіп, мақтауын жаудырса, Баян Алагөзова камзол төңірегіндегі барлық шешімін күйеуі қолдап отырғанын айтып, ағынан жарылды.

Камзол төңірегіндегі дау

Еске салсақ, бұған дейін Мәдениет және ақпарат министрлігі "Қыз Жібек" фильмінде пайдаланылған, Меруерт Өтекешова киген камзолға қатысты мәлімдеме жасаған болатын.

Артынша қазақстандық продюсер әрі актриса Баян Алагөзова Instagram парақшасында "Қыз Жібек" фильмінде Меруерт Өтекешова киген камзол төңірегінде туындаған дауға қатысты пікір білдірген еді.

Ол Меруерт Өтекешеваға өмірінің соңына дейін ай сайын 1 млн теңгеден төлеп отыратынын мәлімдеді.

Көп ұзамай Меруерт Өтекешева Майя Бекбаеваға эксклюзивті сұхбат беріп, камзолға қатысты оқиғаны қалай қабылдағанын айтты.

Аңыз актриса бұл жаңалықты өзі де әлеуметтік желіден естіп, таңғалғанын жасырмады.

Мәтіннен қате тапсаңыз, бізге жазыңыз