Түркістан облысы Сауран ауданына қарасты Құмтүйін ауылы қоғамдық тәртіп пен салауатты өмір салтын берік ұстанған үлгілі елді мекендердің бірі ретінде танылып отыр. Ауылда соңғы төрт жыл ішінде бірде-бір қылмыстың тіркелмеуі – бұл тек ресми статистика ғана емес, тұрғындардың саналы өмір салты мен ортақ жауапкершілігінің нақты көрінісі.

Мұндай нәтижеге қол жеткізуде ауыл халқының ауызбіршілігі шешуші рөл атқарады. Тұрғындар өзара сыйластық пен түсіністікті басты құндылық ретінде қалыптастырған. Сонымен қатар, құқық қорғау органдарының жүйелі профилактикалық жұмыстары да бұл жетістікке айтарлықтай үлес қосып келеді. Полиция қызметкерлері ауыл тұрғындарымен тұрақты түрде кездесулер өткізіп, құқықбұзушылықтың алдын алу, заң талаптарын түсіндіру және қоғамдық тәртіпті сақтау бағытында кешенді жұмыстар жүргізуде.

Құмтүйін ауылының тағы бір ерекшелігі – мұнда соңғы бес жылдан бері алкоголь өнімдері мүлдем сатылмайды. Бұл бастама тұрғындардың өзара келісімі негізінде жүзеге асып, бүгінде ауыл өмірінің ажырамас қағидатына айналған. Салауатты өмір салтын ұстану, әсіресе жастар арасында кеңінен қолдау тапқан. Нәтижесінде, ауылда тыныштық пен тәртіп сақталып, тұрғындардың өмір сапасы айтарлықтай жақсарған.

Ауыл ақсақалы, ардагер Есенғали Мырзабеков бұл туралы былай дейді:

«Алдымен тәртіп сақшыларына алғыс айтқым келеді. Олар тұрғындармен тығыз байланыста жұмыс істеп, ауылымыздың тыныштығын күзетіп жүр. Біздің ауылда мүлдем ішімдік сатылмайды. Жастар да бұл тәртіпке үйренген. Түнде бей-берекет жүрмейді, шуламайды. Көшелеріміз таза, ауылымыз көрікті. Үлгілі ауылдардың біріміз десек, артық емес».

Бүгінде Құмтүйін ауылында екі мыңға жуық тұрғын тұрады. Елді мекенде жұмыс істейтін үш дүкеннің ешқайсысында алкоголь өнімдері сатылмайды. Бұл – ауыл тұрғындарының ортақ ұстанымы мен саналы таңдауының нәтижесі.

Ардагер кәсіпкер Ырысбай Айтуғановтың айтуынша, бұл бастама ешқандай мәжбүрлеусіз, тұрғындардың өз еркімен қабылданған:

«12-13 жыл бұрын ешкімнің үгітінсіз-ақ арақ сатуды тоқтаттық. Қазір ауылдағы үш дүкеннің бірде-бірі ішімдік сатпайды. Халық бұрынғыдай емес, ішімдікке әуес емес. Әсіресе жастар бұл әдеттен алыс. Үлкенді құрметтеп, кішіні сыйлайды. Ынтымағымыз жарасқан, ауылымыз көркейіп келеді».

Ауыл тұрғындары Түркістан өңірінің тарихи тұлғаларын, соның ішінде ел бірлігі мен әділдікті ту еткен билердің өнегесін үлгі тұтады. Бұл да – қоғамдық келісім мен тәртіптің сақталуына оң әсерін тигізіп отырған маңызды факторлардың бірі.

Құмтүйін ауылындағы бұл оң тәжірибе «Қауіпсіз ел» ұлттық жобасының негізгі бағыттарымен толық үндеседі. Аталған жоба қоғамдық қауіпсіздікті қамтамасыз ету, құқықбұзушылықтың алдын алу және азаматтардың құқықтық мәдениетін арттыруды көздейді. Ал Құмтүйін тұрғындары бұл міндеттерді күнделікті өмір салтына айналдыра отырып, нақты нәтижеге қол жеткізіп отыр.

Сонымен қатар, ауылдағы қоғамдық тәртіптің сақталуы, құқықбұзушылықтың болмауы және салауатты өмір салтының қалыптасуы – қауіпсіз қоғам құрудың тиімді үлгісі. Бұл тәжірибе өзге елді мекендерге де үлгі бола алады.

Жалпы, Құмтүйін ауылы – бірлік пен тәртіптің, жауапкершілік пен саналы өмір салтының айқын көрінісі. Мұндай елді мекендер ел қауіпсіздігін нығайтуға, қоғамда тұрақтылық пен татулықты сақтауға маңызды үлес қосатыны сөзсіз.