Атлант мұхитында круиздік лайнермен саяхаттап жүрген үш турист көз жұмды. Олар сирек кездесетін хантавирустан қайтыс болуы мүмкін. ДДСҰ тексеру жүргізіп жатыр, деп хабарлайды Guardian басылымына сілтеме жасаған KAZ.NUR.KZ.

Сирек кездесетін хантавирус Аргентинадан жүзіп шығып, Кабо-Верде аралдарында тоқтап тұрған MV Hondius кемесінде таралғаны анықталған. Үш турист көз жұмған.

Марқұмдардың екеуі Нидерландыдан келген 70 және 69 жастағы ерлі-зайыпты болған.

Оңтүстік Африка Республикасының Денсаулық сақтау министрлігінің мәліметінше, ер адам кемеде ауырып, Әулие Елена аралында қайтыс болған, ал оның әйелі Оңтүстік Африкадағы Кемптон-Парк ауруханадасында дүние салған.

Сондай-ақ ведомство қайтыс болған үшінші адамның 69 жастағы британиялық азамат екенін, ол өзін кемеде жайсыз сезінгенін, кейін Йоханнесбургтегі жекеменшік ауруханаға жеткізілгенін мәлімдеді. Одан хантавирус анықталған.

Қазіргі уақытта Дүниежүзілік денсаулық сақтау ұйымы (ДДСҰ) тексеру жүргізіп жатыр.

АҚШ Ауруларды бақылау және алдын алу орталықтарының мәліметтері бойынша, хантавирустың салдарынан өкпеге және бүйрекке қатты зақым келеді.

Хантавирус инфекциясы өте сирек кездеседі, ол адамнан адамға жұғуы мүмкін. Әзірге нақты емі немесе оған қарсы дәрі жоқ, бірақ уақтылы медициналық көмекке жүгіну өмірді сақтап қалуға сеп болмақ.

Мәтіннен қате тапсаңыз, бізге жазыңыз