Бұл туралы адвокат Данильхан Шағатаев өзінің телеграм арнасында хабарлады, деп жазады inbusiness.kz сайты.

Қазақстан соты немістің Lufthansa әуе компаниясын қазақстандық жолаушыларға материалдық шығын мен моральдық зиян үшін өтемақы төлеуге міндеттеді.

2023 жылдың желтоқсанында Франкфурт-на-Майнеден Алматыға бағыт алған ұшақ техникалық себептерге байланысты Астанаға мәжбүрлі түрде қонған болатын.

– Сол кезде жолаушыларға ыстық тамақ, салқын сусын, қонақүй немесе трансфер ұсынылмады. Әуе компаниясының өкілдері тарапынан ешқандай ақпарат берілмеді. Ақырында, компания өкілі жолаушыларға өз беттерінше басқа рейске билет сатып алуға кеңес берген. Кейін әуе компания бұл шығындарды өтейміз деп уәде еткен. Жолаушылар 2023 жылдың 22 желтоқсанындағы ең жақын рейске FlyArystan компаниясының билеттерін өз қаражаттарына сатып алды. Сонымен қатар, олар қонақүйге, артық жүкке және басқа да қосымша шығындарға ақша төлеуге мәжбүр болды, – деді адвокат.

Алайда, Lufthansa билеттер құнын өтеуге уәде бергенімен, ешқандай өтемақы төленбеген. Жолаушылар бір жарым жыл бойы Азаматтық авиация комитетіне шағымданған, бірақ нәтиже болмаған.

Қазақстан Республикасы қатысушы болып табылатын Монреаль конвенциясына сәйкес, бұл іс Алматы қаласының Түрксіб аудандық сотында қаралды.

Сот шешімі бойынша, Lufthansa әуе компаниясы әр жолаушыға сатып алынған билеттердің, қонақүй мен артық жүкке кеткен шығындардың, сондай-ақ моральдық зиян мен сот шығындарының орнын толтыруы тиіс. Алайда бұл шешім әлі заңды күшіне енген жоқ.