Ғалиасқар Сарыбаев Алматы метросының жұмысындағы қауіпсіздік мәселесін көтерді.

Сенатор Ғалиасқар Сарыбаев бүгін өзінің депутаттық сауалында жаңа пойыздарды сатып алу тәртібінің бұзылуы және олардың Алматы метрополитенінің қолданыстағы жүйесімен толық үйлесімділік талабына байланысты қауіптерге назар аударады.

"Аталмыш көлік түрінің баламалы мүмкіндігінің болмауына байланысты оның жұмысындағы кез-келген іркілістер қаланың бүкіл көлік жүйесінің жұмысына, азаматтардың қауіпсіздігіне, мыңдаған жолаушылардың мүддесіне тікелей әсер етеді. Бүгінгі күні қаржы үнемдеу мақсатында тиімсіз шешімдерді қабылдау, ұзақ мерзімді кезеңде пайдалану шығындарының артуына және метро жұмысының әлеуетінің төмендеуіне әкелетінін ескеру маңызды", – деді Ғалиасқар Сарыбаев.

Сенатор сонымен қатар қоғамдық кеңістікте Алматы метрополитені үшін жылжымалы құрамды жеткізушіні таңдау кезінде қауіптерді кешенді бағалау туралы ақпараттың жоқтығын атап өтті. Ол қауіпсіздік, үйлесімділік және сенімділік мәселелерін ескермей, арзан шешімдерге назар аудару операциялық шығындардың өсуіне және жүйенің тұрақтылығының төмендеуіне әкелуі мүмкін екенін атап көрсетті.

"Алматы метрополитенінің жылжымалы құрамын жаңартуға байланысты қауіпсіздік, технологиялық үйлесімділік және жүйенің тұрақты жұмыс істеуі мәселелері бойынша тәуекелдердің алдын-алу мақсатында кешенді бағалау жүргізуге, орын алған жылжымалы құрамның техникалық ақаулығының жай-күйін жан-жақты зерделеуге, әртүрлі өндірушілерден техникалар мен технологияларды сатып алу кезінде қолданыстағы және жеткізілетін тауарлардың сәйкестігі мен сапасын қатаң қарауға, жолаушылар ағынының өсуі және желі жолдарының кеңеюі жағдайында метрополитеннің үздіксіз, әрі қауіпсіз жұмыс істеуін қамтамасыз етуге бағытталған ұзақ мерзімді стратегиялық жоспар әзірлеуге тапсырма беруіңізді сұраймыз", – деді сенатор.

Оқи отырыңыз:

• Алматы метросының құрылысы кезінде қаражат жымқырылған: 10 адам сотталды
• "Жетон орнына QR-билет беріледі". Алматы метросында төлем жасау тәсілдері өзгерді