Ақмола облысы еліміздің индустриялық драйверлерінің бірі ретінде өз рөлін күшейтіп келеді. Мұнда өңдеуші секторға басымдық берілген заманауи өндірістік жүйе қалыптасуда. Осы тұрғыда дәстүрлі ауыл шаруашылығы шеңберінен шығып, толық өндірістік циклді қамтитын жобалардың маңызы артып отыр. Солардың бірі – Бурабай ауданы Щучинск қаласында 1440 бас ірі қараға арналған сүт-тауарлы ферма мен сүт зауытын салу жобасы.

Жобаның мәні тек жаңа нысандар салуда емес, толық интеграцияланған өндірістік кешен құруда. Мұнда барлық кезең – жем-шөп дайындаудан бастап, өңдеу және дайын өнім шығаруға дейін бір технологиялық тізбекке біріктіріледі. Бұл ресурстарды тиімді пайдалануға және өндірістің ұзақ мерзімді тұрақтылығын қамтамасыз етуге мүмкіндік береді.

Қазіргі таңда құрылыс-монтаж жұмыстары жоспарға сай қатар жүргізіліп жатыр. Солтүстік өңірдің климаттық ерекшеліктеріне қарамастан, мердігер ұйымдар белгіленген қарқынды сақтауда. Ферма мен өңдеу зауытының қатар салынуы болашақта логистикалық және технологиялық процестерді алдын ала үйлестіруге мүмкіндік береді.

Жоба импортты алмастыруға бағытталған. Тамақ өнімдерінің сапасы мен қауіпсіздігіне қойылатын талаптар күшейген жағдайда, өз өңдеу базасын қалыптастыру стратегиялық міндетке айналып отыр. Іске қосылғаннан кейін сүт зауыты тәулігіне 55 тоннаға дейін өнім шығара алады.

Жобада заманауи технологияларға ерекше көңіл бөлінген. Фермада сауу каруселі, автоматтандырылған күтіп-бағу жүйелері, сүт блогы және жем дайындау цехы орнатылады. Сондай-ақ микроклиматты интеллектуалды басқару жүйесі енгізіліп, температура, ылғалдылық және жарық режимі автоматты түрде бақыланады.

Жобаның маңызды бөлігі – өз жем-шөп базасын қалыптастыру. Осы мақсатта суармалы егістік жерлерін дамыту жобасы қатар жүзеге асырылуда.

"Жаңа сүт-тауарлы фермаға байланысты біз суармалы жерлер жобасын іске асырып жатырмыз. Жобаның қуаттылығы – 600 гектар егіс алқабы. Мақсат – фермаға қажетті шырынды жем-шөппен тұрақты қамтамасыз ету. Жылдық қуаттылығы 24 мың тонна болады. Жоба құны – 1,5 млрд теңге. Іске асыру мерзімі – 2026 жылдың шілдесінен қараша айына дейін", — деді "BURABAY MILK" ЖШС агрономы Сергей Кульбоко.

Осылайша кәсіпорын толық жабық өндірістік цикл қалыптастырып отыр. Бұл өндірістің тиімділігін арттырып қана қоймай, маусымдық тәуекелдер мен сыртқы жеткізілімге тәуелділікті азайтады.

Құрылыс кезеңінің өзінде жоба аудан экономикасына оң әсерін тигізіп отыр. Жұмысқа 15-тен астам техника мен 100-ден аса адам тартылған, олардың басым бөлігі – жергілікті тұрғындар.

"Барлық құрылыс және монтаж жұмыстары кесте бойынша жүріп жатыр. Сүт зауытын биыл жыл соңына дейін аяқтауды жоспарлап отырмыз, қытайлық серіктестермен бірге заманауи технологияларды енгізе отырып жұмыс істеп жатырмыз. Сүт-тауарлы ферманы тамыз айының соңына дейін аяқтаймыз. Солтүстік Қазақстанның қатаң климаттық жағдайына қарамастан, жұмыс жоспарға сай жүріп жатыр", — деді мердігер компания басшысы Әлібек Ауельбеков.

Жобада шетелдік серіктестердің қатысуы да маңызды рөл атқарады. Бұл халықаралық стандарттарға сай заманауи жабдықтарды енгізуге және өнім сапасын арттыруға мүмкіндік береді.

Жалпы алғанда Бурабай ауданындағы бұл жоба өңір экономикасындағы құрылымдық өзгерістерді көрсетеді. Яғни шикізаттық модельден өңдеуші өндірістерді дамытуға көшу үрдісі жүріп жатыр. Мұндай кластерлер экономиканы әртараптандыруға және оның тұрақтылығын арттыруға бағытталған маңызды қадам болып саналады.

Мәтіннен қате тапсаңыз, бізге жазыңыз