Әлеуметтік желіні шолып отырып, ашуға булыққан сәттер көпшілікке таныс шығар? Мұны ағылшын тілінде Rage bait деп атайды.

Яғни желі қолданушыларының теріс эмоциясын тудыруға арналған ғаламтордағы контент ұғымы. Мұны ағылшын тілінің Оксфорд сөздігі 2025 жылдың басты сөзі деп бағалады.

Өзге де танымал сөздіктер жыл сөзіне лайық деп таныған нұсқаларын ұсынған. Барлығы дерлік ғаламтордағы өмір мен цифрлық ортаның адам өміріне әсерімен байланысты.

Қазір ғаламтордағы белсенділікті арттыру үшін авторлар небір құйтырқы әрекеттерге баратыны жасырын емес. Солардың бірі – қасақана адамның ызасын тудыруға бағытталған онлайн-контент. Желі қолданушылары қандай да бір жағымсыз жарияланымдарды оқып, ашуға булығып, пікір қалдырады. Ал соның нәтижесінде авторлар қаралым жинап, танымалдығы арта түседі. Оксфорд сөздігінің деректеріне қарағанда, дәл осы ұғымды білдіретін Rage bait сөзін пайдалану кейінгі 12 айда үш есе артқан.

Ал Кембридж сөздігі «параәлеуметтік» деген сын есімді 2025 жылдың басты сөзі ретінде атады. Ағылшын тілі сөздігінің бас редакторы Колин Макинтоштың айтуынша, биыл осы сөзге қызығушылық айтарлықтай артқан. Бұл өмірде көріп-білмеген адамға не кейіпкерге бауыр басып қалу дегенді білдіреді. Ол танымал тұлға, кітап, фильм кейіпкері, тіпті, чат-бот болуы да мүмкін. Параәлеуметтік қарым-қатынастар инфлюенсерлер арқылы тауарларын сататын белгілі брендтер арасында кеңінен пайдаланылады. Өйткені олардың аузынан шыққан әр сөз, әр кеңеске тұрғындар көзсіз сенеді.

Collins сөздігінің мәліметіне сүйенсек, vibe coding сөзі жыл сөзіне айналған. Мағынасы – арнайы командалар және жасанды интеллектінің көмегімен сайт немесе бағдарлама жасап шығару. IT-мамандары кодтарды ұзақ уақыт қолдан жазбай-ақ, машинаға не қажет екенін қарапайым тілде түсіндіреді. Ал жасанды сана айтқаныңызды бұлжытпай орындап береді. Бүгінде бұл термин Кремний алқабында ғана емес, күнделікті тұрмыста да жиі қолданылатын болған.

Авторы: Мөлдір Жақан