Президенттің баспасөз хатшысы Руслан Желдібай Telegram желісіндегі арнасында мемлекет басшысы Қасым-Жомарт Тоқаевтың биыл атқарған жұмысы туралы айтты, деп хабарлайды KAZ.NUR.KZ.

Руслан Желдібайдың сөзінше, биыл мемлекет басшысының сыртқы және ішкі саясат бағытындағы қызметі өте қауырт әрі жемісті өтті.

"2025 жыл елеулі саяси және әлеуметтік-экономикалық жаңғыруларға толы болды. Ең бастысы, халықтың тұрмыс-тіршілігінде оң өзгерістер болды. Жаңа өндіріс орындары ашылып, қамба астыққа толды. Тұрғын үйлер, мектептер мен ауруханалар салынып, көлік жолдары жаңартылды", — дейді президенттің баспасөз хатшысы желідегі жазбасында.

Қасым-Жомарт Тоқаев биыл еліміздің 9 өңіріне жұмыс сапарымен барып, 50-ден астам өндірістік, ғылыми, әлеуметтік-мәдени нысанды аралап көрді.

Сондай-ақ Президент 16 облыс және республикалық маңызы бар қала әкімдерінің есебін тыңдады.

Руслан Желдібайдың сөзінше, 2025 жылдың қорытындысы бойынша экономикалық өсім 6 пайыздан асады деп күтіледі. Бұл – соңғы он жылдағы ең жоғары көрсеткіш.

️Қазақстан тарихында тұңғыш рет ішкі жалпы өнім көлемі 300 млрд доллардан асады. Ол жан басына шаққанда 15 мың доллардан келеді. ️Елімізде жалпы құны 1478,1 млрд теңгені құрайтын 185 жоба пайдалануға берілді. 22,8 мыңнан астам тұрақты жұмыс орны ашылды.

Одан бөлек биыл еліміздің көлік-логистика саласында бірқатар жұмыс атқарылған. Президент:

• Достық – Мойынты темір жолының екінші желісін;
• Қостанай облысындағы автокөлік зауытын іске қосты;
• Шымкент және Қызылорда әуежайының жаңа терминалдарын аралап көрді;
• Астанадағы зауыт шығарған алғашқы жолаушылар вагонымен танысты.

Бұдан бөлек қара және түсті металлургия, химия, целлюлоза-қағаз, жеңіл және тағам өнеркәсібінде, құрылыс индустриясында бірқатар жоба іске қосылды.

️"Мемлекет басшысы Қазақстанның көлік-логистика әлеуетін кеңейтіп, елімізді Еуразиядағы ірі транзит хабына айналдыруға жіті мән береді. 2025 жылы 13 мың шақырым автокөлік жолын салу және жөндеу жұмыстары басталды. Жаңа жолдардың ұзындығы – 1,9 мың шақырым", — делінген Руслан Желдібайдың жазбасында.

Стратегиялық тұрғыдан маңызды күрежолдар қатарында Орталық – Батыс автомагистралы, Қарағанды – Жезқазған, Ақтөбе – Ұлғайсын, Атырау – Доссор учаскелері бар.

️Мемлекет басшысының тапсырмасымен Зайсан, Катонқарағай және Кендірліде үш жаңа әуежай құрылысы басталды. Арқалық әуежайын қалпына келтіру жұмыстары қолға алынды.

Президент әуе арқылы жүк тасымалдайтын алғашқы ұлттық компанияны құру бастамасын қолдады. Бұл еліміздің көлік әлеуетін дұрыс пайдаланып, әлемдік нарыққа шығуға мүмкіндік береді.

️2025 жылы ел нарығына бірқатар жаңа авиакомпания кірді. Бұдан бөлек 35-тен астам жаңа бағдар, соның ішінде тұңғыш рет Шанхай, Гуанчжоу мен Мюнхенге тікелей рейстер ашылды.

️Қызылжар – Мойынты екінші жолының, Алматы маңындағы айналма жолдың, Дарбаза – Мақтаарал және Бақты – Аягөз жаңа теміржол желілерінің құрылысы жүріп жатыр.

️Ел аумағындағы 124 вокзалға күрделі жөндеу, жаңғырту жұмыстары жүргізілуде.

Цифрландыру мен жасанды интеллектіні дамытуға қатысты Руслан Желдібай президенттің биылғы Жолдауда Қазақстанды алдағы үш жылдың ішінде толық цифрлық мемлекетке айналдыру жөнінде стратегиялық міндет қойғанын еске салып өтті.

"Еліміздің цифрлық экожүйесін қалыптастыру аясында Президент тапсырмасымен қыруар шаруа атқарылды. "Жасанды интеллект туралы" Заңның қабылдануы – аталған саладағы жаңалықтың бірі. Осылайша, Қазақстан ЖИ саласындағы қоғамдық қатынастарды реттеуге заң жүзінде негіз қалаған әлемдегі алғашқы елдердің қатарына енді", — делінген жазбада.

Аталған саладағы мемлекеттік саясатты үйлестіру мақсатында:

• Жасанды интеллект және цифрлық даму министрлігі құрылды;
• Астанада Аlemcloud ұлттық суперкомпьютерін ресми түрде іске қосты ;
• елімізде ЖИ саласындағы арнаулы зерттеу университетін құру ұсынылды;
• Астанада Alemai халықаралық жасанды интеллект орталығы ашылды;
• Студенттерге арналған AI-Sana бағдарламасы басталды. Сол арқылы қазірдің өзінде 440 мыңнан астам студент ЖИ саласын меңгерді.
• Жасанды интеллект саласындағы алғашқы қазақстандық "сыңармүйіз" стартап – Higgsfield AI пайда болды.

Одан бөлек пезиденттік баспасөз хатшысы биыл қабылданған нормативтік-құқықтық актілерге тоқталды.

"Биыл мемлекет басшысы 95 Заңға, 388 Жарлыққа, 80 Өкімге, 22 отырыс хаттамасына, 3504 қызметтік құжатқа қол қойды. Олардың қатарында Бюджет, Салық, Су кодекстерінің жаңа редакциялары мен "Жасанды интеллект туралы" Заңды ерекше атап өтуге болады", — дейді ол.

️Сонымен қатар президент "Түркістан қаласының ерекше мәртебесі туралы" Заңға, сондай-ақ "Алатау қаласына даму қарқыны озық қала" арнаулы мәртебесін беру туралы" Жарлыққа қол қойды.

Сондай-ақ мемлекет басшысының халықаралық қатынастар бойынша атқарған жұмысы айтылған.

Мемлекет басшысы биыл 23 рет шетелге шыққан.

"Оның ішінде Ресейге және Өзбекстанға мемлекеттік сапармен барды. ҚХР, Иордания, Түркия, Қырғызстан және Жапония секілді елдерге 5 ресми сапар ұйымдастырылды. Ресей (екі рет), АҚШ (екі рет), Түрікменстан (екі рет), БАӘ, Өзбекстан, Әзербайжан, Тәжікстан және Қырғызстан сияқты мемлекеттерге 16 мәрте жұмыс сапарымен барды", — дейді Руслан Желдібай.

Халықаралық кездесулер кезінде жалпы сомасы 70 млрд доллардан асатын коммерциялық келісімдер жасалды.

️Президент шет мемлекеттердің үкімет басшыларымен, басқа да жоғары лауазымды тұлғаларымен, халықаралық құрылымдар жетекшілерімен, іскерлік топ өкілдерімен және сарапшылармен 186 кездесу өткізді.

Қазақстан халықаралық диалогтың белсенді алаңына айналды. 2025 жылы шет мемлекеттердің басшылары Қазақстанға 30 рет cапармен келді.

️Олардың арасында ҚХР, Италия (екі рет), Грузия, Өзбекстан, Словения, Вьетнам, БАӘ, Руанда, Солтүстік Македония, Болгария, Словакия, Иордания, Конго Демократиялық Республикасы, Мьянма, Мажарстан, Әзербайжан, Финляндия, Эстония, Армения, Түрікменстан, Швейцария және Иран елдерінің мемлекет және үкімет басшылары бар.

Айта кетерлігі, бір жыл ішінде президент өңірлерге және шет мемлекеттерге жасаған сапары барысында 168 960 шақырым жол жүрді. 252 сағат уақытын ұшақта өткізген.

Мәтіннен қате тапсаңыз, бізге жазыңыз