Президент Қаржы нарығын реттеу және дамыту агенттігі төрағасының орынбасарын лауазымынан босатты, деп хабарлайды Ақордаға сілтеме жасаған KAZ.NUR.KZ.

"Мемлекет басшысының өкімімен Мария Жамаловна Хаджиева Қазақстан Республикасының Қаржы нарығын реттеу және дамыту агенттігі төрағасының орынбасары лауазымынан босатылды", — делінген хабарламада.

Қаржы нарығын реттеу және дамыту агенттігінің ресми сайтындағы мәлімет бойынша, Мария Хаджиева 1971 жылғы 22 наурызда дүниеге келген.

Еңбек жолын 1995 жылы Әділет министрлігінің Бас заңнама басқармасының конституциялық және әлеуметтік-мәдени заңнама бөлімінің жетекші консультанты болып бастаған.

Ал бағалы қағаздар нарығындағы қызметін 2000 жылы Ұлттық банктің заң департаменті бағалы қағаздар нарығын және жинақтаушы зейнетақы қорларын реттеуді құқықтық қамтамасыз ету басқармасының бас маманы лауазымынан бастаған.

2006 жылғы қараша – 2008 жылғы мамыр аралығында Қаржы нарығы мен қаржы ұйымдарын реттеу және қадағалау агенттігінің бағалы қағаздар нарығының субъектілерін және жинақтаушы зейнетақы қорларын қадағалау департаменті директорының орынбасары, 2008 жылғы мамырдан 2011 жылға дейін департамент директоры болып жұмыс істеген.

2011 жылдан бастап Ұлттық банктің Қаржы нарығын және қаржы ұйымдарын бақылау мен қадағалау комитеті төрағасының орынбасары болған.

2014 жылдан бастап Ұлттық банктің бағалы қағаздар нарығының субъектілерін қадағалау департаментінің директоры лауазымын атқарған. Кейін 2016 жылы Бағалы қағаздар нарығы департаментін басқарған. 2017 жылы "Бағалы қағаздардың бірыңғай тіркеушісі" АҚ Басқармасы төрағасының орынбасары лауазымына тағайындалып, бір жылдан кейін оған басшылық еткен.

Әр жылдары "Казкоммерц Секьюритиз", "Бағалы қағаздардың орталық депозитарийі", "Бағалы қағаздардың бірыңғай тіркеушісі", "Сақтандыру төлемдеріне кепілдік беру қорының", Қазақстан қор биржасының директорлар кеңесінің құрамына кірген.

2019 жылы Қазақстан қаржыгерлері қауымдастығы кеңесі төрағасының бірінші орынбасары болды.

2019 жылғы 26 желтоқсанда Қаржы нарығын реттеу және дамыту агенттігі төрағасының орынбасары болып тағайындалды.

Мәтіннен қате тапсаңыз, бізге жазыңыз