Биыл Маңғыстау облысының мектеп түлектері елдің оңтүстігіндегі педагогикалық жоғары оқу орындарына тегін қабылданды.

Мемлекеттік грантқа ие болған студенттер алғашқы семестрді аяқтады.

Маңғыстау облысы әкімінің орынбасары Асхат Оралов Шымкентте педагогикалық бағытта білім алып жатқан студенттермен кездесті. Олардың оқу үлгерімі мен әлеуметтік жағдайымен танысып, ұсыныс-тілектерін тыңдады. Оның айтуынша, мемлекеттің осындай қолдау көрсетуі – оларға деген үлкен сенімнің айғағы.

Асхат Оралов, Маңғыстау облысы әкімінің бірінші орынбасары:

- Маңғыстаудан шыққан 18 мың түлек қазір басқа өңірлерде, шетелде білім алуда. Біз тек қана мұнайшы ретінде емес, ертең мұғалім ретінде жұмысқа кіретін, экономикамызға үлесін қосатын, болашақ мамандар осы жерде оқудан-тәжірибеден өтсін деген ниетпен жасап жатқан қадамдар.

Биыл маңғыстау өңірінің 19 түлегі мақсатты білім грантына ие болды. Олардың басым бөлігі педагогикалық саланың оқу бағдарламасымен қатар, қосымша дағдыларын жетілдіруге көңіл бөлген. Сала мамандары кәсіби шеберлігін арттыруға ынталы жастардан зор үміт күтеді.

Әлібек Нұртаев, Ө. Жәнібеков атындағы ОҚПУ Басқарма төрағасы, ректор м.а:

- Бірінші семестрді аяқтады. Барлығы 4-5-ке оқыды. Білім үйірмесі, тіл үйірмесі, спорт үйірмелері бар. Оның барлығына студенттеріміздің ішінде қатысып жатқандар бар.

Алдағы уақытта пилоттық жоба аясында білім гранттарының саны артуы мүмкін. Бұл өңірдегі педагог мамандардың тапшылығын жойып, ауыл мектептерін жас кадрлармен қамтуға ықпал етеді.

Авторлары: Нұрсұлтан Мұхамеджан, Нұрмахан Бекмұратов