Алматыда белгілі актёр, кинодраматург, "Менің атым Қожа" кинокартинасында басты рөлді сомдаған Нұрлан Сегізбаевтың денесі жер қойнына тапсырылды. Бірнеше буын өкілдерінің сүйікті кейіпкерін сомдаған актёрмен қоштасу рәсімі Алматыдағы Жазушылар одағының ғимаратында өтті, деп жазады KAZ.NUR.KZ.

Бұл туралы тележурналист, продюсер Серік Абас-шах Facebook желісіндегі парақшасында жазды. Сөзінше, "Қожаның" рөлін сомдаған актёрді шығарып салуға киногерлер, журналистер, ЖОО ұстазтары келген.

"Кейіпкеріміз кезінде (2009 жылы) "Жазушылар одағына бармаймын, ондағылар біз сияқты киногерлерді жақтырмайды" деген екен. Бала кезінен танымал болған актёр әрі сценарист ағамыздың денесі өзінің соңғы үйіне "өзін жақтыра қоймаған" одақтың ескі ғимаратынан аттанды. Уақыт өте реніші басылған болар, шығармашылық үйіне қатысты пікірі өзгеруі де мүмкін, қалай болғанда да ауыр дертке шалдыққан ағамыздың өзі өтініш айтып, аз уақыт бұрын ғана "киногерлерді жақтырмайтын" одаққа мүше болып қабылданыпты", — деп жазды ол.

Сонымен бірге ол Нұрлан Сегізбаевты ақтық сапарға шығарып салуға келгендер саны да көп болмағанына назар аударды.

"Қожамен" қоштасуға (қала орталығында орналасқан ғимаратқа) бара жатып (балалық шағын "Қожамен" байланыстыратын бірнеше ұрпақтың нөпірі жайылып) көлігімді қояр жер табу қиын болар деп ойлағанмын. Олай болмады. Тым жақын жерден орын табылды.

"Бекежанмен" қоштасуға кеше ғана трпиасып барған қалың қауым "Қожамен" қоштасуға сондай легімен келе қойған жоқ. Оннан бірі де келмеді (мүмкін "жиырмадан бірі" немесе "отыздан бірі" келген шығар). Мұны да түсінуге болады. "Сабақтан жиі қашқыш, мұғалімді ренжіте бергіш тентек Қожаны" кинода сомдаған Нұрлан ағамыз өмірде мүлдем басқа адам болған сияқты. Интеллигент. Артық сөзі жоқ. Ұстамды. Сабырлы.

Бала кезінде түскен фильмі арқылы елге кеңінен танылып үлгерсе де кино бағытына бет бұрмай (актёрлік кәсіптен алыс) институттың филология факультетін бітіріп, орыс тілінің мұғалімі болып біраз уақыт жұмыс істеген екен. Кейінірек (27 жасында) әйгілі ВГИК-тің күндізгі бөліміне оқуға түсіп, сценарист мамандығы бойынша сабақ алыпты. Содан бері "телевизия, кино, әдебиет саласында жұмыс істеп жүріпті".

Қаншама жылдар бойы үйсіз-күйсіз жүргенін естіген (сол кездегі қала әкімі) Иманғали Тасмағамбетов пәтер бергізген екен (бұл кісіге). Әкесінің өмірлік ережесін ұстап, ешкімнен ештеңе сұрамай тірлік еткен Нұрлан Санжарұлы атаққа да, марапатқа да қызықпаған жан еді. Қарапайым адам ретінде ғұмыр кешті, қарапайым адам ретінде өмірден өтті.

"Менің атым Қожа" фильмі экранға 1964 жылы шығыпты. Дүние есігін ашқан жылым ғой бұл. Жаңа жылда 62 жасқа толамыз (Құдай қаласа). Ал "Қожа" 12-13 жасындағы қалпында қалады мәңгі. Иманды болыңыз, Қожа! Жасай беріңіз, Қожа!", — деп жазды ол.

Еске салсақ, 26 желтоқсанда белгілі актёр, кинодраматург, "Менің атым Қожа" кинокартинасында басты рөлді сомдаған Нұрлан Сегізбаев өмірден озғанын жазған едік. Бұл туралы мәдениет және ақпарат министрлігі хабарлады.

Бұған дейін биыл сәуірде отандық журналист Жанар Қанафина белгілі актёр, әйгілі "Менің атым Қожа" фильмінде Қожа рөлін сомдаған Нұрлан Сегізбаевтың дертке шалдыққанын және оның халі мүшкіл екенін жеткізген. 75 жастағы актёр тәулігіне 14 сағат бойы тыныс алу аппаратына тәуелді екенін және оған қаржылай көмек қажет екенін айтқан.

Мәтіннен қате тапсаңыз, бізге жазыңыз