Ұзындығы 67 шақырым "Күрті – Қонаев" тас жолы жаңғыртылып, төрт жолақты жолға айналды. "ҚазАвтоЖол" республикалық маңызы бар автожолда қозғалыс ашылғанын мәлім етті, деп хабарлайды KAZ.NUR.KZ.

"ҚазАвтоЖол" ұлттық компаниясының мәліметінше, "Астана – Қарағанды – Балқаш – Алматы" бағыты бойындағы маңызды буын саналатын республикалық маңызы бар "Күрті – Қонаев" автожолында (0–67 шақырым) негізгі құрылыс жұмыстары аяқталды.

Қазіргі таңда ұзындығы 67 шақырым учаскеде төрт жолақты жолда қозғалыс ашылды. Бұл шешім жолдың өткізу қабілетін және жолдағы қауіпсіздікті едәуір арттырып, жол жүру уақытын қысқартады. Сондай-ақ еліміздің ең ірі агломерациясын орталық өңірлермен тиімді байланыстыруға мүмкіндік берді. Жоба Еуропалық қайта құру және даму банкінің қаражаты есебінен қаржыландырылды.

Қайта жаңғырту параметрлеріне сәйкес автожол І б техникалық санатына келтіріліп, төрт жолақты қозғалыс ұйымдастырылды. Жоба шеңберінде төрт көпір құрылысы, бір көлік айрығы, айрық құрамындағы бір жол өткелі, бес бұрылыс алаңы және 61 су өткізу құбыры салынды. Нысан құрылысына 305 маман мен 104 бірлік құрылыс техникасы жұмылдырылды.

""Күрті – Қонаев" бағытында төрт жолақты қозғалыстың ашылуы – көлік шығындарын төмендетіп, логистиканың болжамдылығын арттыратын, сапарды мейлінше қауіпсіз әрі жайлы ететін нақты нәтиже. Алматы облысы үшін бұл жоба өте маңызды. Өйткені бұл жол жолаушы және жүк тасымалы айналымының өсуіне тікелей ықпал етіп, өңірдің транзиттік әлеуетін күшейтеді", – деді "ҚазАвтоЖол" ұлттық компаниясы" Басқарма төрағасы Дархан Иманашев.

Мәтіннен қате тапсаңыз, бізге жазыңыз