Баянауыл ауданындағы Сұлу-сор көлінен табылған қос аққудың тағдыры белгілі болды. Жапан далада құстарды кездейсоқ көріп, құтқарып қалған Бауыржан Жақыпов оларды Павлодар ауылындағы зообаққа тапсырды, деп хабарлайды 24KZ.

Телеарнаның хабарлауынша, зообақта құтқарылған құстар уақытша паналайды. Сұлусордан жеткізілген қос аққу жаңа жерге бейімделіп, тағдырластарына үйренісіп үлгерді.

Зообақ өкілдері көктемде аққулар өз айдынымен қайта қауышады деп сендірген.

"Ондай құстарды үйде ұстауға құқым жоқ екен. Сондықтан бәріміздің міндетіміз болған соң, өз міндетімді атқарып, Жануарларды қорғау орталығына апарып тапсырдым. Әр маман өз ісімен айналысқан дұрыс деп ойлаймын", — деді құстарды құтқарған Баянауыл тұрғыны.

Зообақ жетекшісі олардың өміріне ешқандай қауіп жоқ екенін айтады.

"Аққуларды қабылдап алдық. Олардың өміріне ешқандай қауіп жоқ. Басқа құстармен бірге тамақтанады, суын ішеді. Көктемде табиғатқа қайта жіберуді көздеп отырмыз", — дейді Игорь Байромов.

Естеріңізге сала кетейік, қауырсыны мұзға қатып, ұша алмай қалған аққуды Баянауыл ауданының тұрғыны құтқарып қалғанын хабарлағанбыз. Оның сыңары да сол маңайдан алыстап кетпей, қыстап қалғаны белгілі болған еді.

Мәтіннен қате тапсаңыз, бізге жазыңыз