Оқу-ағарту министрлігіне қарасты Балалардың құқықтарын қорғау комитеті Ұлыбританияда дүниеге келген бір жасар Қазақстан азаматының аман-есен елге оралғанын мәлімдеді, деп хабарлайды KAZ.NUR.KZ.

Ведомствоның мәліметінше, бастапқыда Ұлыбританияның құзырлы органдары сәбиді британдық отбасына асыруға беру мүмкіндігін қарастырғандықтан, аталған жағдай шұғыл әрекет етуді талап еткен.

Қазақстандық тараптың үйлесімді әрі жедел іс-қимылының нәтижесінде сәби өзінің туған әжесімен және әкесімен қауышқан.

Мамандардың туыстарымен жүргізген профилактикалық және түсіндіру жұмыстарының барысында қыз баланың әжесі мен әкесі оны өз қамқорлығына алып, отбасында тәрбиелеуге ниетті екенін жеткізген.

"Кішкентай отандасымызды елге қайтару үшін ҚР Сыртқы істер министрлігімен бірлесе отырып ауқымды жұмыс атқарылды. Біз сәбидің жақын туыстарын анықтап, оны Қазақстанға қайтару туралы шешімге қол жеткіздік. Қазіргі уақытта бүлдіршін өз үйінде, туғандарының жанында", — деді Оқу-ағарту министрлігі Балалардың құқықтарын қорғау комитетінің төрағасы Насымжан Оспанова.

Елге қайтару шаралары аясында балаға қазақстандық үлгідегі туу туралы куәлік рәсімделген.

Мәтіннен қате тапсаңыз, бізге жазыңыз