Тәжірибелі маман Әли Әлиев елордалық "Жеңіс" футбол клубының бас бапкері болып тағайындалды, деп хабарлайды клубтың баспасөз қызметіне сілтеме жасаған KAZ.NUR.KZ.

Клубтың баспасөз қызметінің жазуынша, Әли Әлиев — қазақ футболының нағыз қайраткері. Оның спорттық жолы табандылық пен кәсібиліктің жарқын үлгісі.

Ол мансабының алтын жылдарын алматылық "Қайратта" өткізіп, екі дүркін Қазақстан чемпионы және еліміздің Кубогының иегері атанған.

Түркияның "Эржиесспор", "Кайсериспор" және "Карталспор" клубтарында өнер көрсетіп, халықаралық деңгейде үлкен тәжірибе жинақтаған. Қазақстан ұлттық құрамасының сапында ел намысын абыроймен қорғаған.

Бапкерлікке ауысқан соң өзінің тактикалық тұрғыдан сауатты және психологиялық тұрғыдан мықты маман екенін дәлелдеген: "Қызыл-Жар" клубын жаттықтырып, команданы Еурокубок аймағына дейін жеткізіп және Конференция лигасының іріктеу кезеңдерінде тарихи нәтижелер көрсеткен.

"Әли Әлиев тек бапкер ғана емес, футболды терең талдайтын сарапшы ретінде де елімізде үлкен құрметке ие. Енді Әли Ханалыұлы өзінің білімі мен энергиясын елордалық "Жеңістің" даңқын қайта шығаруға жұмсайды.

Біз бапкерімізбен бірге жаңа биіктерді бағындыратынымызға сенімдіміз! Қош келдіңіз, Әли Ханалыұлы! Жеңісті күндер көп болсын!" — делінген хабарламада.

Мәтіннен қате тапсаңыз, бізге жазыңыз