Сот Аида Жұмағалиеваны кінәлі деп танығанына қарамастан, жазадан босатты.

Астанада жеке клиникалардың бірінде наркозбен тіс емдеткеннен кейін үш жасар қыз баланың көз жұмуына байланысты іс бойынша сот үкімі шықты. Аталған іс бойынша айыпталушы ретінде дәрігер-анестезиолог Аида Жұмағалиева тартылған.

Сот Аида Жұмағалиеваны Қылмыстық кодекстің 317-бабының 3-бөлігі бойынша, яғни "Медицина қызметкерінің кәсіби міндеттерін тиісінше орындамауы салдарынан абайсызда адам өліміне әкеп соққан әрекет" деп танып, кінәлі деп шешті.

Сот үкімімен Аида Жұмағалиева 2 жыл мерзімге бас бостандығынан айырылып, сондай-ақ 3 жыл бойы медициналық қызметпен айналысу және медициналық қызмет көрсету құқығынан айырылды. Алайда амнистия туралы заңға сәйкес ол негізгі жазасын өтеуден босатылды.

"Аида Жұмағалиеваны негізгі жазасын өтеуден босату. Үкім заңды күшіне енгеннен кейін Жұмағалиева тұрғылықты жері бойынша пробация қызметіне тіркеуге тұру үшін келуге міндеттелсін. Оған қатысты таңдалған процессуалдық мәжбүрлеу шарасы – келу туралы міндеттеме үкім заңды күшіне енген соң жойылсын", – деп мәлімдеді судья.

Еске салайық, 2024 жылғы 30 қазанда Астанадағы жекеменшік клиникалардың бірінде наркозбен тіс емдеткеннен кейін үш жасар қыз бала оянбай қалған. Баланың әкесі сотта аталған процедураның үш жарым сағаттан астам уақытқа созылғанын және стоматологтың бірден 18 тісті емдегенін айтқан.