Соңғы кезде қазақстандықтар "Құпия Санта" ойыны арқылы шоттарына ірі сомадағы ақша түсіп жатқанын айтып, желіде скриншоттар жариялап жүр. Алайда бұл "ойын" қауіп тудыруы мүмкін, деп хабарлайды Fingramota.kz.

Басылымның мәліметінше, аңғал адамдар сәттілігін сынап көру үшін банк картасы туралы деректерін, тіпті жеке деректерін де желіде қалдырып жатыр.

"Бұл несімен қауіпті: Алаяқтар желіде жарияланған карта нөмірі арқылы ақша шығарып ала алмаса да, деректерді желі қолданушыларының назарына ашық қалдырған адамға фишинг пен алаяқтық қоңыраудың құрбаны болу қаупі бар. Ал шотқа түскен ірі сома қайырымдылықтың атын жамылған қаражатты жылыстату әрекеті болуы мүмкін. Картасына мұндай ақша түскен адам қылмыстық істе сыбайлас болып есептеледі, тіпті оның кінәсіздігі дәлелденсе де, бұл жағдайдан стресске түсіп, денсаулығына зиян келтіреді. Тіпті қылмыстық жауапкершілікке тартылуы да мүмкін", — делінген мақалада.

Ақтөбе полиция департаменті өкілдерінің сөзінше, аталған схема уақыт өте келе өзгереді: алаяқтар ақшаны аңқау азаматтарға желіде қалдырған деректері бойынша жібереді және қаражатты одан әрі басқа бір нөмірге жіберуді сұрайды. Оның себебін олар "бұл қайырымдылық науқанының бір бөлігі" деп түсіндіреді де, өздеріне белгілі бір пайызын қалдырады.

Бірақ адам түскен ақшаны өз шотынан белгісіз біреуге аударса, ол автоматты түрде дроппер-серіктес болып шыға келеді, себебі шот иесі кез келген операция үшін жауап береді. Сонымен қатар алаяқтар ең қорғалмаған аудиторияны – балалар мен жасөспірімдерді пайдаланады, оларды "бұл әлеуметтік желілердегі кең тараған "ойынның" бір бөлігі" деп сендіреді.

Мәтіннен қате тапсаңыз, бізге жазыңыз