20 желтоқсанда кешкі уақытта Ақтөбе облысының Темір ауданында 41 жастағы малшыны іздестіру мақсатында іздестіру-құтқару жұмыстары басталды, деп хабарлайды Zakon.kz.

ҚР ТЖМ баспасөз қызметінің хабарлауынша, ер адам 20 желтоқсан күні түстен кейін мал іздеуге атпен шығып, қайта оралмаған. Онымен байланыс болмаған.

"Іздестіру жұмыстарына ТЖМ, ПД және жергілікті атқарушы органдардың күштері жұмылдырылды. Кинологиялық есептоп, ұшқышсыз ұшу аппараты және Starlink спутниктік байланысы бар ТЖМ тобы да жұмыс істеді. Бүгін, 21 желтоқсанда іздестіру тобы жоғалған азаматты Шұбарқұдық елдімекенінен 30 шақырым қашықтықта тапты", делінген хабарламада.

Ер адамның жағдайы қанағаттанарлық деңгейде екені, медициналық көмекке мұқтаждығы жоқтығы да нақтыланады.

Бұған дейін Алматыда бір күн бұрын жоғалып кеткен 18 жастағы қыздың денесі таудан табылғаны хабарланған.