Шымкент қаласында базалық инфрақұрылымды дамыту бағытында ауқымды жұмыстар кезең-кезеңімен жүзеге асып жатыр, деп хабарлайды Шымкент қаласы әкімдігінің баспасөз қызметі.

Әкімдіктің хабарлауынша, ауыз сумен, электр қуатымен қамтамасыз ету және көше жарықтандыру салаларында қол жеткізілген нәтижелер тұрғындардың өмір сапасын арттыруға тікелей әсер етіп жатыр.

"Бүгінде қаладағы 81 елді мекеннің 80-і ауыз су жүйесіне қосылған. Қалған Құрсай елді мекенінде (23 мың тұрғын) су құбыры толық тартылып, қазір абаттандыру және қалпына келтіру жұмыстары жүргізілуде. Соңғы екі жылда Сайрам, Бозарық, Қайтпас-1 елді мекендерінде ауыз су жүйесінің құрылысы аяқталып, 27 мыңға жуық адам орталықтандырылған таза суға қол жеткізді.

Нәтижесінде қаладағы ауыз сумен қамту деңгейі 99,5 пайызға жетіп отыр, ал жыл соңына қарай бұл көрсеткіш 99,9 пайызды құрайды деп күтілуде", — делінген әкімдік хабарламасында.

Сонымен қатар демеушілердің қолдауымен бірқатар елді мекендерде су жүйелері салынған. Текесу ауылына 14 шақырым су құбыры тартылып, Айкөл елді мекенінде 18 шақырым су желісінің құрылысы аяқталған. Бұл жобалардың жалпы құны 250 млн теңгеден асқан. Құрылыс жұмыстарын мердігер мекемелер демеушілік негізде ұсынып, іске асыруды "Су құбыры және канализация басқармасы" МКК қамтамасыз еткен.

Әкімдік электр қуатымен қамту саласында да оң өзгерістер барекенін хабарлады.

"Қазіргі таңда қаладағы барлық 81 елді мекен электр желісімен толық қамтылған. 2024 жылы Асар-2 және Бозарық елді мекендерінде электр жүйелерінің құрылысы аяқталып, 15 мыңға жуық тұрғын сапалы электр энергиясына қосылды. Биыл 7 елді мекенде жаңа электр желілері мен 3 қосалқы станцияның құрылысы жүргізілуде. Атап айтқанда, бірнеше жылға созылған "Ақжар 110 кВ" қосалқы станциясының құрылысы толық аяқталып, қабылдау сатысында тұр. Бұл нысан бірқатар елді мекендер мен индустриалды аймақтарды тұрақты электр қуатымен қамтамасыз етпек.

Қала көшелерін жарықтандыру да басты назарда. Егер 2023 жылы көшелердің тек 30 пайызы жарықтандырылса, 2024 жылы бұл көрсеткіш 65,9 пайызға жетті. Соңғы бір жылда 2 270 көше жарықтандырылып, демеушілер есебінен қосымша 125 көше шаммен қамтылды. 2025 жылы тағы 2 291 көшені жарықтандыру жоспарланып отыр. Жоспар толық орындалған жағдайда қала аумағы 100 пайыз сыртқы жарықтандырумен қамтамасыз етіледі", — дейді әкімдік өкілдері.

Мәтіннен қате тапсаңыз, бізге жазыңыз