Үкіметтің жыл қорытындысына арналған баспасөз мәслихатында өнеркәсіп және құрылыс вице-министрі Қуандық Қажкенов тұрғын үй саласындағы мемлекеттік қолдау шараларының нәтижелерін таныстырды.

Оның айтуынша, халықтың әлеуметтік осал топтары үшін 7,2 мыңға жуық пәтер сатып алынған. Ал «Наурыз» және «Наурыз Жұмыскер» бағдарламалары аясында жалпы көлемі 205,7 млрд теңге болатын ипотекалық қарыздар берілді.

Спикер тұрғын үй кезегін есепке алу тетіктерінің «Отбасы банкіне» берілуі процестің ашықтығын арттырғанын атап өтті. Қазіргі уақытта тұрғын үй кезегінде 960 мыңнан астам азамат тұр.

Сонымен қатар мемлекет тұрғын үйді жалға алу шығындарын субсидиялауды жалғастыруда. Бұл қолдауды 11 мыңнан астам азамат пайдаланып, бюджеттен 7,6 млрд теңге бөлінген. Бұдан бөлек, жылдық 2% және 5% мөлшерлемемен 4,9 мың жеңілдетілген ипотекалық қарыз берілген.