Атырау қаласында көпқабатты тұрғын үйлердің бірінен 38 жастағы азаматтың өлі денесі табылды. Көршілердің айтуынша, марқұмның мәйіті пәтер ішінде шамамен үш апта бойы жатқан. Соның салдарынан бес қабатты үйге жағымсыз иіс тарап, тұрғындардың тынысы тарылған, деп хабарлайды 31-арнаның "Информбюро" ақпараттық бағдарламасы.
Жергілікті тұрғындар дезинфекция жұмыстары уақытылы жүргізілмесе, түрлі инфекция тарауы мүмкін деп алаңдап отыр.
Марқұмның туысы Олеся Енина бауырының ұзақ уақыт хабарсыз кеткеніне мән бермегенін айтып, қатты өкініш білдірді.
"Таңғы уақытта келдім. Есікті ұзақ қақтым, ешкім ашпады. Пәтерден сұмдық иіс шығып тұрды. Содан полиция қызметкерлерін шақырттым. Үйдің ішінде інімнің сұлық жатқанын көрдім. Денесінде зорлық-зомбылық белгілері болған жоқ. Қан қысымы көтеріліп, қайтыс болды деп ойлаймын. Ауырып жүргенін бірнеше рет айтқан, бірақ мән бермегенбіз", – деді марқұмның туысы Олеся Енина.
Туыстарының айтуынша, марқұм үшінші топтағы мүгедек, балдақпен жүрген. Үйленбеген, пәтерде жалғыз тұрған. Көршілер пәтерден шыққан өткір иістің шамамен үш апта бойы кетпей тұрғанын жеткізді.
Жағымсыз иіс бүкіл үйге тарап кетті. Тұрғындар одан түрлі вирус тарауы мүмкін деп қауіптеніп отыр. Сондықтан дезинфекция жұмыстарын шұғыл жүргізуді сұрайды.
Оқи отырыңыз: АҚШ-та режиссёр Роб Райнер мен оның жұбайының өліміне байланысты ұлына айып тағылды
Тұрғындар өз күшімен үйдің кіреберісін тазалап көргенімен, өткір иіс сейілмеген. Амалы таусылған жұрт жауапты мекемелер арнайы құралдармен залалсыздандыру жұмыстарын жүргізбесе, жағдай қиындайтынын айтады.
"Өзі кейде 1-2 күнге көрінбей кететін. Жалғыз тұрған соң аса мән бере бермейтінбіз. Соңғы рет 22-сі күні үйіне кірген. Содан бері шықпаған. Есік ашылғанда қатты иіс шықты. Мәйітті лифтімен алып кетті, бірақ подъездің іші әлі де қатты сасып тұр. Тұрғындар болып өзіміз адам жалдадық", – деді марқұмның көршісі Ұзаққали Аюпов.
Атырау облысы полиция департаменті аталған дерек бойынша сот-медициналық сараптама тағайындалғанын хабарлады.
"Қазіргі уақытта кешенді тергеу амалдары басталды. Қайғылы оқиғаның мән-жайы анықталып жатыр", — деді полиция департаментінің ақпараттық саясат бөлімінің аға инспекторы Дина Максотова.
Оқи отырыңыз: Жамбыл облысында жол апаты болды: 10 адам зардап шекті, оның алтауы – балалар
Тұрғындардың шағымынан кейін көпқабатты үйге коммуналдық мекеме өкілдері келіп, мәйіт табылған пәтерде тазалау және залалсыздандыру жұмыстарын бастады.
