Себебі жылдар бойы оны игермей келген.

Өкінішке қарай, ауыл шаруашылығын дамытып, жерден нәпақа табу үшін учаске рәсімдеген кей кәсіпкерлер жылдар бойы оны игермей, бос ұстайды. Сондай шаруашылықтардың бірі Павлодар облысында анықталды, деп хабарлайды inbusiness.kz тілшісі.

Ақтоғай ауданының прокурорлары жергілікті шаруашылық басшысы жер заңнамасын бұзғанын әшкереледі.

"Жаңабет" шаруа қожалығы ұзақ жыл бойы ауыл шаруашылығы жерін пайдаланбағаны анықталды. Аудандық прокуратура ауданаралық экономикалық сотқа 200 гектардан астам бос жатқан учаскені мәжбүрлі түрде алуға қатысты шағым түсірді", – деп мәлімдеді Павлодар облыстық прокуратурасы өкілдері.

Нәтижесінде соттың шешімімен аталған шаруашылықпен жалға алу келісімшарты бұзылып, учаскелер мемлекет меншігіне қайтарылды. Әкімдіктің қаулысымен бағалау құны 100 млн теңгеден асатын жер телімі мемлекетке ресімделді.