Алматыда халықаралық деңгейдегі заманауи стадион 45 мың көрерменге арналып салынатын болды. Бұл туралы Орталық коммуникациялар қызметінің алаңында өткен брифинг барысында Алматы қаласының әкімі Дархан Сатыбалды мәлімдеді, деп хабарлайды KAZ.NUR.KZ.

Дархан Сатыбалдының айтуынша, Алматыда салауатты өмір салтын кеңінен насихаттау мақсатында спорттық инфрақұрылымды жаңғырту жұмыстары жалғасады.

2027 жылға дейін "Медеу" биік таулы спорт кешенін қайта жаңғырту жоспарланған. Негізгі жобалардың бірі – UEFA талаптарына сай, 45 мың көрерменге арналған жаңа стадион салу. Нысан құрылысын 2027 жылы аяқтау көзделіп отыр.

Естеріңізге сала кетейік, бұған дейін қала әкімдігі Алматыда 35 мың көрерменге есептелген, UEFA-ның төртінші санат талаптарына сай келетін заманауи стадион бой көтеретінін хабарлаған еді.

Жаңа стадион Құлжа мен Талғар тас жолдарының арасында, аумағы шамамен 15 гектар жерде салынады деп жоспарланған. Бұл аумақ болашақта қала үшін көлік-логистикалық хабқа айналып, көрермендер мен қонақтарға барынша ыңғайлы жағдай жасалмақ.

Мәтіннен қате тапсаңыз, бізге жазыңыз