Ауылдағы медициналық пункттің жағдайы сын көтермейді.

Алматы облысының бірқатар ауыл тұрғындары қыстың қақаған аязына емес, күн сайын қайталанатын жарық пен жылудың өшуіне шағымданып отыр. Сағаттап сөнетін электр қуаты қарапайым тұрмысты үлкен сынаққа айналдырған. Тұрғындардың айтуынша, салқын үйлерде балалар мен қарттар жиі ауыра бастаса да, бұл мәселе жергілікті билікке бірнеше рет жеткізілгенімен, әлі күнге дейін нақты нәтиже жоқ. Бұл туралы 31-арнаның "Информбюро" ақпараттық бағдарламасы хабарлады.

Жаңалық ауылының халқы әсіресе электр энергиясының тұрақсыздығына наразы. Олардың сөзінше, аздап жел тұрса болды, жарық бірден өшеді. Ал электр қуаты болмаған жағдайда пеш жағу мүмкін болмай, үйлер іші суып кетеді.

"8 сағат бойы жарық болған жоқ. Жарық өшкен соң пеш жағу мүмкін емес. Пеш жанбағаннан кейін үйдің іші суық болып кетті. Сағат төртте сөнді де, түнгі он жарым немесе он бір шамасында ғана қайта қосылды. Бізде жарық үнемі өшіп қалады. Аздап жел тұрса да, электр тоғы бірден сөнеді", – дейді Жаңалық ауылының тұрғыны Мөлдір Нысанбаева.

Салқын үйлерде отырған балалар мен қарттардың жиі сырқаттанатынын тұрғындар алаңдаушылықпен жеткізді. Алайда науқастарға көрсетілетін медициналық көмектің өзі көңіл көншітпейді. Ауылдағы медициналық пункттің жағдайы сын көтермейді. Контейнерден жасалған шағын ғимаратта дәрігерлер де, қажетті құрал-жабдықтар да тапшы. Сондықтан тұрғындар мұнда ем алу үшін емес, ұзақ кезек күту үшін келетіндерін алға тартады.

Оқи отырыңыз: Биыл өңірлерді қолдауға 6,9 трлн теңге жұмсалды – Қаржы министрі

Ал жергілікті әкімдік өкілдері жарықтың жиі өшуін апаттық жағдайлармен байланыстырады. Олардың айтуынша, бірнеше елдімекен бір трансформаторға қосылғандықтан, желі кейде жүктемеге шыдамай қалады. Ал амбулатория мәселесі жақын арада шешіледі деп уәде берілді.

"Соңғы екі айда жарықтың жиі өшуі авариялық жағдайларға байланысты болды. Бір жағдайда газ тарту кезінде мердігер компанияның техникасы электр желісіне зақым келтірді. Екінші рет жоғары кернеулі желідегі шыны изолятордың резеңкесі күйіп кеткен. Ал амбулатория бойынша айтсақ, дәрігерлер штат бойынша қамтылған. Әкімдік тарапынан қосымша жер телімі бөлінді, 50 сотық жер дайын. Құжаттары реттелсе, құрылыс жұмыстары басталады", – деді Қайнар ауылдық округінің әкімі Нұрбол Есенбаев.

Жаңалық ауылының тұрғындары айтылған уәделерге үмітпен қарағанымен, бұрын да бірнеше рет берілген сөздің орындалмағанын еске алып, сенімдерінің селкеу түсуінен қауіптенеді.