Қазақстанда мереке күндері әуе рейстерінің саны артады.

Мереке күндері жолаушылар ағынының артуына байланысты әуежайлар мен әуе компаниялары жұмысын күшейтіп, қосымша 100 әуе рейсін іске қосады. Бұл туралы Көлік министрлігінің баспасөз қызметі хабарлады.

Қосымша рейстер Астана – Алматы, Алматы – Орал, Алматы – Семей, Астана – Түркістан, Астана – Ақтөбе, Алматы – Ақтау, Алматы – Ақтөбе және Астана – Шымкент бағыттары бойынша жоспарланған.

Мәселе Көлік вице-министрі Талғат Ластаевтың төрағалығымен өткен кеңесте талқыланды. Жиынға Air Astana, FlyArystan, SCAT, VietJet Qazaqstan әуе компанияларының, сондай-ақ Астана мен Алматы әуежайларының басшылығы қатысты.

Оқи отырыңыз: Алматы мен Бангкок арасында тікелей әуе рейсі іске қосылды

Кеңес барысында әуе компаниялары мен әуежайларға мереке күндері ұшулардың үздіксіздігін қамтамасыз ету үшін әуе кемелерінің резервін және қосымша жерүсті техникасын қарастыру, персонал құрамын тәжірибелі мамандармен күшейту, рейс кешіккен жағдайда жолаушыларды ыстық тамақ пен сусындармен қамтамасыз ету тапсырылды. Сонымен қатар рейстердің кешігуі туралы ақпаратты ресми сайттар, әлеуметтік желілер, мобильді қосымшалар, әуежай таблолары және БАҚ арқылы жедел хабарлау міндеттелді. Вице-министр авиация инспекторларына мерекелік күндері мониторингтік топтар құруды тапсырды.

Министрлік барлық қабылданып жатқан шаралар ең алдымен ұшу қауіпсіздігін қамтамасыз етуге бағытталғанын атап өтті.