Павлодарда танымал спортшы, еркін күрестен жазғы Олимпиада ойындарының қола жүлдегері Дәулет Шабанбай Ұлттық гвардияның әскери қызметшілеріне күш қолданғаны үшін сотталды, деп хабарлайды KAZ.NUR.KZ Ирбис TV-ға сілтеме жасап.

Спортшыға Қылмыстық кодекстің 380-бабының 4-бөлігінің 1-тармағы бойынша, яғни "Екі немесе одан да көп адамға қатысты жасалған билік өкіліне қатысты күш қолдану" бойынша айып тағылды.

Дәулет Шабанбай соттан өзіне жеңілдік жасауды сұрады. Ол кінәсін толық мойындап, өкінетінін білдірді.

Оның адвокаты спортшының кәмелетке толмаған балаларды тәрбиелеп отырғанын, қарт ата-анасы бар екенін, ал қоғамнан оқшаулайтын орындарда айтарлықтай уақыт өткізгенін атап өтті.

Прокурор спортшыға төрт жылға бас бостандығынан айыру жазасын сұрады. Барлық тарапты тыңдап, іс материалдарын қарап шыққаннан кейін сот үкім шығарды.

"Сотталушы Қылмыстық кодекстің 380-бабының 4-бөлігі бойынша қылмыстық құқық бұзушылық жасағаны үшін кінәлі деп танылып, үш жылға бас бостандығынан айырылсын", — деген үкімді жариялады Павлодар қалалық қылмыстық істер бойынша мамандандырылған сотының судьясы Айгүл Ахметова.

Сот әлеуметтік оқшаулау жазасының берілуі сөзсіз екені туралы қорытынды жасап, бас бостандығынан ең аз мерзімге айыру жазасын тағайындады. Үкім заңды күшіне енген жоқ.

Мәтіннен қате тапсаңыз, бізге жазыңыз