Ішкі істер министрлігі желіде тараған "жолдардағы тұзақ" туралы ақпаратты жоққа шығарып, жалған ақпарат таратқандар жауапқа тартылатынын еске салды, деп хабарлайды KAZ.NUR.KZ ведомствоның баспасөз қызметіне сілтеме жасап.

Министрлік желіде таралып жатқан ақпараттың скриншотын жариялады. Ондағы мәлімет бойынша жүргізуші жолдан беті көрпешемен жабылған балалар автокреслосын көрген-міс, автордың сөзінше, қаскөйлер көлікті тоқтатып, тонау үшін немесе көлікті ұрлау үшін осындай "тұзақ" ойластырған.

ІІМ Қазақстанда мұндай жағдай тіркелмегенін айтып, ақпаратты жоққа шығарды.

"Мессенджерлерде таралып жатқан жолдардағы балалар автокреслосы түріндегі "тұзақ", сондай-ақ көлікті тоқтату үшін оның алдыңғы әйнегіне жұмыртқа лақтыратындар туралы ақпарат шындыққа жанаспайды", — делінген хабарламада."

ІІМ желі қолданушыларына БАҚ немесе ақпараттық-коммуникациялық желілер арқылы жалған ақпарат таратудың жауапкершілікке әкеп соғатынын еске салады.

"Тек ресми дереккөздерге ғана сенуді ұсынамыз", — дейді ведомстводағылар.

Мәтіннен қате тапсаңыз, бізге жазыңыз