Ел егемендігін жариялап, тәуелсіздік алғаннан кейінгі тоқсаныншы жылдардан бері мемлекеттің еңсесін тіктеп, әр өңірдің өркендеуіне өлшеусіз үлес қосқан атпал азаматтар аз емес. Сол санаулы тұлғалардың бірі – Қонаев қаласының тұрғыны, өмірін туған жердің дамуына арнаған Сәуле Нұрсолтанова. Қапшағай шаһарына ұлы тұлға Дінмұхамед Қонаевтың есімін беру туралы бастама көтерілгенде, оны жергілікті мәслихат депутаттары бірауыздан қолдаған еді. Осы тарихи шешімнің нәтижесінде қала Алматы облысының орталығы мәртебесіне ие болып, жаңа серпінмен дамуға мүмкіндік алды.

Сәуле Қайырлықызының есімі Қонаев қаласының тұрғындарына жақсы таныс. Ол өзінің еңбек жолын қатардағы қарапайым мұғалімдіктен бастап, кейін мектеп директоры, қалалық мәслихаттың хатшысы, Қонаев қаласы әкімінің идеология жөніндегі орынбасары қызметін атқарды. «Қазақстан Республикасы білім беру ісінің үздігі», «Білім беру ісінің Құрметті қызметкері» атанған кейіпкеріміз «Ерен еңбегі үшін» және «Қазақстан Республикасының Тәуелсіздігіне 30 жыл» мерекелік медалімен марапатталған.

Сәуле Нұрсолтанова, Қонаев қаласы әкімінің кеңесшісі:

- Менің ең есімде қалатын тарихи оқиға десем болады, 2022 жылы осы Қонаев қаласы Алматы облысының орталығы болуы. Одан бұрын өздеріңіз білесіздер, «Қапшағай қаласы» деп аталды. «Қонаев қаласы» деп атауы өзгеруіне енді себепкер болып, халықтың пікірін тыңдап, мәслихаттың сессиясында қарап, шешім қабылдап, сол шешімге қол қойған мәслихаттың төрағасымын. Енді оны өзім үшін де үлкен, маңызды тарихи оқиға деп есептеймін.

Қапшағай қалалық мәслихатының V-VI-VII шақырылымының депутаты болған Сәуле Қайырлықызы өңірдегі түйіні тарқатылмаған түйткілді мәселелердің дер кезінде шешілуіне өз үлесін қоса білді. Оның бұл еңбегін ұзақ жылдар бойы үзеңгі қағыстырып, бірге қызмет еткен әріптестері мен мемлекеттік қызметтегі жас мамандар да жоғары бағалайды.

Ізтілеу Тойшыбайұлы, Қазақстан Жазушылар Одағының мүшесі:

- Сәуле Қайырлықызы осы Қонаев қаласында еңбек жасағалы 40 жылдай болып қалған шығар. Осы жерде тұрып, осы жердегі әрбір адамды, әрбір тұрғындарды жақсы біледі. Үкіметтік қызметкердің ең мықты мінезі адамгершілік пен адаммен сөйлесіп, тілін тауып, жақсы сөйлесіп шығарып салса, ол адам туралы ешкім ешқашан жаман айтпайды. Сондай адамгершілігі бар. Сонысына мен өте ризамын.

Жеңіс Төребеков, Қонаев қалалық Ішкі саясат бөлімінің басшысы:

- Әртүрлі жағдайда жақсы басшылық жасап, халықпен қарым-қатынас орнатуда өте жүйелі жұмыс істедім деп ойлаймын ол кісімен. Ішкі саясат болсын, жұмыспен қамту және әлеуметтік бағдарламалар бөлімі, мансап орталығы деген сияқты, сол жерде мамандар бар, жас басшылар бар, соларға, бұл кісінің тәжірибесі жеткілікті ғой, соларға бағыт-бағдар беріп, жол көрсетіп, аналық кеңесін айтып отырады.

Сәуле Қайырлықызы – жоғары білімді филолог, ұлттық идеология тақырыбын терең меңгерген, тәжірибелі де жауапты мемлекеттік қызметкер. Үш перзент тәрбиелеп өсірген ардақты ана бүгінде олардан тараған 10 немеренің асықтай алқалы әжесі. «Жас мемлекеттік қызметшілерге айтарым – адамның ең үлкен байлығы да, ең үлкен абыройы да туған еліне шынайы, адал қызмет етуімен өлшенеді. Барлық әріптестерімді және егемен еліміздің еркін ойлы азаматтарын алда келе жатқан Тәуелсіздік күні мерекесімен шын жүректен құттықтаймын», – деді ол.

Авторлары: Ардақ Айбарұлы, Аят Дүйсенбаев, Аманжол Жөңкешов