Алматы облысы Райымбек ауылында 200-ден аса отбасы қалаға шығатын жалғыз жолдың жекеге сатылып кеткеніне шағымданды, деп хабарлайды Almaty.tv тілшісі.
Райымбек ауылындағы негізгі көшенің бойына бір аптадан бері қоршау қойыла бастаған. Бұл – елдімекенді қаламен жалғайтын жалғыз бағыт. Көпшіліктің айтуынша, көше тұтас жабылып қалса, 200-ден аса тұрғынның қалаға қатынауы қиындайды. 2013 жылы 35 соттық жер телімі коммерциялық негізде сатылып кеткен. Кейіннен бірнеше рет иесі өзгергені белгілі. Енді бір жеті ішінде кәсіпкер аумақты толық қоршап, өз мақсатында пайдаланып, бизнесін дөңгелетпек.
"Әкімшілік вертолет сатып алып берсе, әр үйге, әр түтінге, ұшып кіріп, шығып отыра аламыз. Ондай мүмкіндік болмаса, аштан өліп, шыға алмаймыз. Әкімшілік сөз беріп, келіссе, кәсіпкерлер жолды қалдыратынын айтты", – деді Райымбек ауылдық округінің тұрғыны Бауыржан Бөрібаев.
"Екі жолдың шыға берісі сатылып кеткен. Біздің бармаған жеріміз жоқ. Әкімшілікке де, ауданға да бардық. Халықтың сөзін тыңдайтын ешкім жоқ", – деді Райымбек ауылдық округінің тұрғыны Сұлтанбек Шегебаев.
Тұрғындар мәселені жергілікті билікке де, облыс басшылығына да айтқан. Бірақ мәселенің шешімі табылмапты. Енді жер иесі күтпеймін деп бекініп, құрылысты дереу бастауға ниетті.
"Біз сатып алғалы 4 жыл болды. Әкімге айтылды, құлаққа аспады, мен де әкімге бардым. Кәсіпкермін, істі қосуым керек. Қоспасақ, ешқандай кіріс жоқ", – деді жер иесі Айнұр Нұрқожа.
Алайда әкімдік өкілдері бұл аумақта құрылыс салуға заңмен тыйым салынғанын айтты. Құжаттардағы бір маңызды тетік – бұл жер Үлкен Алматы айналма жолының буферлік аймағында орналасқан.
"Құрылысқа рұқсат құжаттар алынбаған. Бұл Райымбек ауданының бас жоспарына сәйкес, үлкен Алматы айналма жолының буферлік аумағында орналасқан. Бұл жерде құрылысқа рұқсат қағаздарын беруге болмайды", – деді Қарасай ауданы Сәулет және қала құрылысы бөлімінің басшысы Дінсұлтан Бейсенбек.
Халық жолды жабуға түбегейлі қарсылығын білдіріп, әкімдікті дереу әрекет етуге шақырды. Оның сөзінше, соңғы он жылда округте бірнеше басшы ауысқан. Әрқайсысы мәселені қолға алғанымен, жауапкершілік келесі әкімге өтіп, іс аяқсыз қалған. Ал қазіргі басшы мәселенің шешу жолын қарастыратынын жеткізді.
"Бұл кісі "жолды сатып алу мәселесі бойынша бір келісімге келуіміз керек" деп отыр. Жер қатынастары, Сәулет-құрылыс бөлімі бар, ауылдық округ әкімдігі бірге ауыл тұрғындарына ыңғайлы болатындай сатып алу мәселесін де қарастырамыз", – деді Райымбек ауылдық округінің әкімі Ержас Тоқтасынов.
Мәселенің нақты қашан шешілетіні әзірге белгісіз. Бірақ учаске иесі мен жұрт күтуден әбден шаршағанын жеткізді. Әкімдік жерді мемлекет меншігіне қайтарып немесе учаскенің жартысын сатып алуға әрекет ететінін айтты. Бұл тағы кемінде 3-4 айға созылуы мүмкін.
Авторлар: Әйкерім Пернебек, Әлішер Ерғалиұлы
Мәтіннен қате тапсаңыз, бізге жазыңыз
