Елордада 15 қыркүйектен бастап бірнеше ұйым жаңа жұмыс кестесіне көшті.

Бүгін Астана қалалық мәслихатының кезекті сессиясында қала басшысы Жеңіс Қасымбек жаңа жұмыс кестесінің көлік кептелесіне қалай әсер еткенін айтты, деп жазады inbusiness.kz сайты.

Әкімнің айтуынша, кейінгі күндері қалаға қар жауып, спорттық және өзге де іс-шаралар ұйымдастырылады. Мұндай кезде қала жолдарында қиындық туындайды.

– Қазіргі ең басты проблема – трафик. Таяуда ЛРТ-ні іске қосамыз. Көптеген жаңа жол салынды. Келесі жылы Тәуелсіздік даңғылын біршама ұзартуды жоспарлап отырмыз. Ол Мәңгілік ел, Тұран, Қабанбай батыр даңғылдарына жүктемені төмендетеді. Негізгі кептеліс Есіл мен Нұра аудандарында көпір бағытында байқалады. Екі жаңа көпір жобаланып жатыр, – деді әкім.

Қала басшысы жұмыс кестесін жылжыту да оң әсерін тигізгенін айтты.

– Әкімдіктің жұмысқа 7:30-да, мемлекеттік органдардың 8:00-де шығуы да өз әсерін тигізіп отыр. Сіздермен кездесуде таңертеңгі сағат 8, 9, 10-да қай көшелердің қанша пайызға босағанын айтып беремін. Қазір мұның бәрі 6:30-7:00-де басталатыны рас. Қалай дегенде де қалалықтар үшін бағдаршам мен аялдамаларды ескергенде автобус қозғалысының жылдамдығы орташа есеппен сағатына 23-25 шақырымды құрайды. Қазір қазан-қарашамен салыстырғанда жылдамдықтың сағатына 2,3 шақырымға артқанын көріп отырмыз, – деді Жеңіс Қасымбек.

Әкім айтқан өзгеріс қала орталығында орналасқан мемлекеттік және жартылай мемлекеттік құрылымдарға ғана қатысты.

Айта кетейік, 15 қыркүйектен бастап қалалық коммуналдық қызметтердің жұмыс күні таңғы 7:30-да басталады, Астана әкімдігінің қызметі – 7:30, кейбір мемлекеттік органдар мен жартылай мемлекеттік компаниялар – 7:30-8:00 аралығында бастайды. Жұмыс уақытының аяқталу сағаты да сәйкесінше өзгертілді.

Жеке сектор, бизнес, мектептер, балабақшалар, ауруханалар, емханалар, ХҚО және басқа әлеуметтік нысандардың жұмыс кестесі өзгерген жоқ.