АШМ ветеринар дәрігерлердің жалақысын көтеруді жоспарлап отыр.

Сенатор Геннадий Шиповских мал дәрігерлерінің жалақысына қатысты мәселе көтерді, деп хабарлайды inbusiness.kz сайты

Геннадий Шиповскихтің сөзінше, мал дәрігерлерінің мәселесі өте қатты өршіп тұр.

"Біз осы "Жұмысшы мамандықтары жылы" аясында мал дәрігерлерінің жағдайын жақсарттық па деген орынды сұрақ туындайды. Әлі күнге дейін бізде мал дәрігерлерінің дефициті жоғары. Бір дәрігер 3-4 ауылдың малын әрең дегенде қамтып өтеді. Бағана Арман Кәрімұлы (ред. – сенатор Арман Өтеғұлов) айтып кеткендей, бізде ол салаға да көптеген жастарымыз барғысы келмейді. Себептері әр алуан. Менің ойымша, бірінші себеп – жалақы мәселесі. Біз орташа жалақы мәселесін қарап өттік, шамамен 170-180 мың теңгені құрап отыр. Егер де біз салыстырмалы түрде алатын болсақ, түрлі платформаларда жұмыс істеп жүрген такси жүргізушілері бүгінде 400-450 мың теңге ақша тауып отыр. Яғни, бұл жердегі мәселелер көп. Оның ішінде имидждік мәселе де бар", – деді депутат.

Сенатор мал дәрігерлерінің әлеуметтік пакеті қашан дұрысталады деген сұрақ қойды.

Ауыл шаруашылығы вице-министрі Аманғали Бердалиннің сөзінше, ведомство жұмысты әуелі мал шаруашылығы мамандарының қауіпсіздігінен бастап отыр.

"Материалдық база дегенде оларға ветеринариялық пункт салып беруіміз керек. Егер инфрақұрылымды жасайтын болсақ, онда барлығы өзімен өзі шешіледі деп отырмыз. Екінші мәселе – еңбекақы. Жалақыға 22 млрд теңге бөлініп отыр. Бұл бір ауылдағы ветеринар дәрігердің айлығы 425 мың теңгеге шығады деп есептеп отырмыз. Бұл – ауылдық елдімекендер үшін бірталай ақша. Ұсыныс республикалық бюджет комиссиясынан өтті, оны Үкімет қолдады. Ертең заң қабылданғаннан кейін бұл мәселе күшіне енеді деп отырмыз", – деп жауап берді вице-министр.