Байқаудың басты мақсаты – шығу тегі туралы құжатсыз жүрген асыл тұқымды тазыларды анықтап, оларды ресми есепке алу және құжаттандыру.

Экстерьерді бағалау және толық сипаттама беру жұмыстарын сарапшылар Анель Болгумбаева мен Наталья Дровосекова жүргізді. Олар иттерді бекітілген тұқымдық стандартқа сәйкес бағалап, қажетті өлшемдерді алды, тіс формулаларын тексерді, анатомиялық құрылымын және қозғалыс ерекшеліктерін саралады. Сонымен қатар сәйкестендіру құралдарын орнатты (чиптеу).

Сараптама нәтижесіне сәйкес, 43 иттің 14-і «өте жақсы» деген баға алып, әрі қарай тұқымдық өсіруге рұқсат алды. Қалған иттер стандарттарға толық сәйкес келмегендіктен, селекциялық жұмысқа жіберілмейді.

Ұйымдастырушылардың айтуынша, мұндай қатаң селекциялық бағалау қазақы тазы тұқымының сапасы мен генетикалық тазалығын арттыруға бағытталған.

Байқау алаңында ұлттық нақышта безендірілген киіз үй фотоаймақ ретінде ұйымдастырылып, қатысушыларға өз тазыларымен естелік суретке түсу мүмкіндігі берілді. Бұл шара қазақы тазының ұлттық қазына ретіндегі мәртебесін ерекше айшықтады.