10 бала ауруханаға жатқызылды.

Алматыда 50-ден астам адам табиғи газдан уланды. Екі бала жансауқтау бөлімінде жатыр, деп хабарлайды inbusiness.kz сайты.

Қалалық қоғамдық денсаулық сақтау басқармасы оқиға орнына 13 жедел жәрдем бригадасы жіберілгенін хабарлады. Барлығы 52 адам зардап шеккен. Оның ішінде балалар да бар. Олар қаладағы медициналық мекемелердің қабылдау бөлімдерінде толық тексеруден өткен. 10 бала ауруханаға жатқызылды.

"Оның ішінде екеуі жансақтау бөлімінде, қалғаны профильді бөлімшелерде жатыр. Басқа пациенттер тексеруден кейін тұрғылықты мекенжайы бойынша амбулаториялық бақылауға жіберілді", – деп хабарлады басқарма.

Осы оқиғаға байланысты "Қазақстан темір жолы" компаниясының баспасөз қызметі ресми ақпарат таратты.

"Алматы-2 теміржол вокзалында тіркелген көміртек тотығымен улану фактісі туралы тараған ақпаратқа байланысты келесіні хабарлаймыз. Аталған оқиғаға Ұлттық тасымалдаушының қатысы жоқ.

Улану жағдайы анықталған пойыз "Жолаушылар тасымалы" АҚ-ның қарауында емес. Бұл құрам жеке меншік тасымалдаушыға тиесілі. Вагондар киностудияға түсірілім өткізудің мақсатында берілген", – делінген хабарламада.

Яғни, пойыз жеке компанияға тиесілі және түсірілім үшін киностудия ретінде берілген.

Қазір оқиғаның мән-жайы анықталып жатыр.