Оқу-ағарту министрі Жұлдыз Сүлейменова пәндерді біріктіріп оқыту жөніндегі бастаманың тоқтатылатынын айтты, деп хабарлайды KAZ.NUR.KZ ведомствоның баспасөз қызметіне сілтеме жасап.

Бұл туралы министр Алматыда өтіп жатқан Халықаралық жас ғалымдар конгресінде айтты.

"Жас ғалымдар конгресінің мінберін пайдалана отырып, бір сұраққа нүкте қойғым келеді. Қоғамда жаратылыстану бағытындағы пәндерді қосып оқытуға байланысты, яғни, физика, химия, биология пәндерін бір пәнге біріктіру туралы қызу талқы жүріп жатыр. Қазіргі таңда бұл пәндер кіріктірілмейтін болды. Демек физика – физика ретінде, химия – химия, билогия – биология ретінде бөлек оқытылады. Біздің мақсатымыз мектеп жасындағы оқушылардың бойында фундаменталды ғылымды терең әрі жүйелі меңгеруге толық жағдай жасау. Пәндерді біріктіру реформасы бүгіннен бастап тоқтатылады. Физика, химия, биология – әрқайсысы жеке оқыту мәртебесін сақтайды", — деді министр.

Мәтіннен қате тапсаңыз, бізге жазыңыз