Балқаш жағалауындағы пайдаланылмаған учаске мемлекет меншігіне қайтарылды, деп хабарлайды Ауыл шаруашылығы министрлігінің Жер ресурстарын басқару комитетіне сілтеме жасаған KAZ.NUR.KZ.

Ведомствоның мәліметінше, АШМ-нің Қарағанды облысы бойынша Жер ресурстарын басқару департаменті бұрын берілген, бірақ игерілмеген жер учаскелерін Балқаш көлі жағалауынан туристік нысандар салу үшін мемлекет меншігіне қайтару бойынша жүйелі жұмыс жүргізіп жатыр.

Жоспардан тыс тексеру нәтижесінде Торанғалық ауылында орналасқан, аумағы 0,5 гектарды құрайтын, демалыс аймағын абаттандыру және туристік қызметтер көрсету үшін берілген, бірақ көптеген жыл бойы пайдаланылмаған жер телімі анықталған. Кәсіпкерге учаскені игеру туралы нұсқама берілген.

Алайда нұсқаманың орындалмауына байланысты департамент кәсіпкерге айыппұл салып, жер учаскесін мәжбүрлі түрде алып қою туралы талаппен сотқа жүгінген.

Қарағанды облысының мамандандырылған ауданаралық экономикалық соты ЖРБД талаптарын толық қанағаттандырып, жер телімін мәжбүрлеп алып қою және оны кейіннен сауда-саттыққа (аукционға) қою туралы шешім қабылдаған.

Сот шешімі заңды күшіне енген.

Мәтіннен қате тапсаңыз, бізге жазыңыз