Жыл басынан бері департаментке тарифтерді бекіту бойынша 30 өтінім келіп түскен, оның 23-і мақұлданып, жетеуі кері қайтарылған.

Батыс Қазақстан облысында табиғи монополиялар субъектілерінің қызметі бойынша қайта есептеу жүргізіліп, "Жайықжылуқуат" АҚ тұтынушыларына жалпы 3,4 млн теңгеден астам қаражат қайтарылды. Бұл туралы өңірлік коммуникациялар қызметінде өткен брифингте Ұлттық экономика министрлігі Табиғи монополияларды реттеу комитетінің БҚО бойынша департамент басшысы Гүлжаз Қазбекова хабарлады.

Облыста қазіргі таңда 37 табиғи монополия субъектісі 47 түрлі қызмет көрсетеді. Олардың сегізі бес жылдық ұзақ мерзімді тарифтер бойынша жұмыс істесе, қалған 29-ы қуаттылығы төмен ұйымдар ретінде тіркелген. Департамент басшысының айтуынша, осы кәсіпорындардың негізгі қорларын жаңарту, қайта құру және модернизациялау жұмыстарына 20,6 млрд теңгеден астам көлемде ұзақ мерзімді инвестициялық бағдарламалар бекітілген.

Жыл басынан бері департаментке тарифтерді бекіту бойынша 30 өтінім келіп түскен, оның 23-і мақұлданып, жетеуі кері қайтарылған. Сонымен қатар инвестициялық бағдарламаларға қатысты 22 өтінім қаралып, оның 13-і бекітілген, біреуі қабылданбаған.

Оқи отырыңыз: Алматыда мемлекеттік баспананы заңсыз жалға бергендер әшкереленді: 160 жағдай тіркелген

Гүлжаз Қазбекованың айтуынша, "Табиғи монополиялар туралы" заң талаптарына сәйкес сыртқы ауаның нақты температурасы ескеріле отырып, "Жайықжылуқуат" АҚ көрсеткен жылумен жабдықтау қызметіне қайта есептеу жүргізілген. Қайта есептеу жылу өлшеу құралдары жоқ тұтынушыларға қатысты жүзеге асырылады.

"Қайта есептеудің нәтижесінде 2024-2025 жылдардағы жылу беру маусымында кәсіпорын тарапынан жылумен жеткіліксіз қамту фактілері анықталды. Тұтынушыларға қайтарылуға тиіс қаражаттың жалпы сомасы 3 403 037 теңгені құрады. Қаражат 2025 жылғы қазан айындағы түбіртектегі төлемді азайту арқылы өтелді", – деді департамент басшысы.