Мұны Жасанды интеллект және цифрлық даму министрлігі Бас прокуратурамен бірлесіп жүзеге асырады.

Бұл – қазақстандықтарды интернет-алаяқтардан қорғау үшін жасалған қадам, деп хабарлайды inbusiness.kz сайты.

Ақпараттық жүйе иелеріне 1414 SMS хабарламаларының орнына ресурстарға қол жеткізу ережелерін қатаңдату тапсырылып отыр.

– Пайдаланушыларға ыңғайлы болу үшін кейбір мемлекеттік ақпараттық ресурс пен сервиске бір реттік код арқылы кіру мүмкіндігі болған. Бұл тәсілді алаяқтар өз пайдасына қолдануы ықтимал еді. Олар ықтимал жәбірленушінің телефон нөміріне 1414 қысқа нөмірінен SMS-хабарлама жіберіп, жеке деректеріне қол жеткізе алуы мүмкін, – делінген Жасанды интеллект және цифрлық даму министрлігі таратқан хабарламада.

Осылайша, бұдан-былай 1414 SMS-кодын қолданатын ақпараттық жүйелерге кіру қосымша қорғалған және тек биометриялық аутентификация, электронды цифрлық қолтаңба немесе арнайы QR-код арқылы ғана қолжетімді саналмақ.

Осы айдан бастап көрсетілген міндетті талаптарды енгізбеген жүйелер 1414 SMS-шлюзінен ажыратылмақ.

Азаматтардың цифрлық сауатын арттыру үшін eGov Mobile мобильді қосымшасының басты бетінде әртүрлі ұсыныс жазылған ақпараттық баннерлер орналастырылып отыр. Онда күмәнді әрекеттерді қалай тану, кибергигиена ережелерін сақтау және цифрлық сервистерді қауіпсіз пайдалану туралы ақпараттар бар.