AMANAT партиясы «Қарызсыз қоғам» жобасының жылдық қорытындысын ұсынып, шараға Үкімет өкілдері, банк секторларының басшылары және сарапшылар қатысты.

Жоба Мемлекет басшысының тапсырмасы бойынша қаржылық сауаттылықты арттыру, борыш жүктемесін азайту және халыққа құқықтық көмек көрсету мақсатында іске асырылуда.

Үш жылда 1,4 млн адам оқытылды, 1 млн-нан астам азамат заңгерлік және қаржылық кеңес алды. Qogamfin.kz жүйесі арқылы борышты қайта құрылымдау, ауыртпалықтарды алып тастау және құжаттарды рәсімдеу процестері цифрландырылды. Call-орталықта 180 заңгер азаматтардың сұрақтарына жауап береді.

Агенттік төрағасы Мәдина Әбілқасымованың айтуынша, жоба аясында 703 мың қарыз алушының 754 млрд теңгелік берешегі реттелді. Қаржы ұйымдары өз қаражаты есебінен 89 мың адамның қарызын толық, 470 мың адамның қарызын ішінара есептен шығарды.

Шамадан тыс кредит алуды шектеу үшін бірқатар шаралар қабылданды:

• банктер мен МҚҰ-ға кредиттерді коллекторларға сатуға 2026 жылға дейін мораторий;

• төлемі 90 күннен асқан азаматтарға тұтынушылық несие беруге тыйым;

• кепілсіз кредиттердің мерзімін 5 жылмен шектеу;

• кешіктіруі бар азаматтарға жаңа кредит беруге шектеулер.

Нәтижесінде кепілсіз тұтынушылық кредиттер өсімі 2025 жылғы 10 айда 13,2%-ға дейін баяулады.

Жобаға институционалдық бағдарлама мәртебесін беру жоспарланып отыр. 2026 жылға арналған Жол картасы әзірленіп, қаржылық мәдениетті нығайту, азаматтардың кірісін арттыру және қаржы омбудсманының бірыңғай кеңсесін құру көзделуде. Сондай-ақ, соттан тыс банкроттық рәсімін жеделдету жоспарлануда.

Қорытынды жиында банктер мен серіктестерге алғыс хаттар табысталды.