Литва бірнеше заңсыз шекара бұзу жағдайына байланысты ел аумағында төтенше жағдай жариялап отыр.

Мұны Беларусь тарапынан жасалған "гибридтік шабуыл" деп айыптайтындар да бар, деп хабарлайды inbusiness.kz сайты.

Литва көрші Беларусьтен күн райын бақылауға арналған шарлар түрінде контрабандалық темекілерді алып өтуге қатысы бар заңсыздықтарды жіпке тізді. Елдің Премьер-министрі Инга Ругиниене "бұл шарлардың әуе кеңістігіне енуін ұлттық қауіпсіздікке және азаматтық авиацияға нақты қауіп төндіру" деп есептейді.

Ресми тұлғалардың сөзінше, осы жылдың өзінде контрабандамен байланысты шамамен 600 шар мен 200-ге жуық дрон Литва әуе кеңістігіне кірген, ол Вильнюс әуежайының бірнеше рет жабылуына әкеліп соқтырды.

Беларусь президенті Александр Лукашенко бұған өз елінің еш қатысы жоғын мәлімдеп отыр. Мәселені ЕО мен НАТО-ға мүше Литваның саясиландырғанын сөз етеді.

Литваның төтенше жағдай режимі 2022 жылы Ресейдің Украинаға толыққанды басып кіргеннен соң енгізілген төтенше жағдайынан бір саты ғана төмен. Бұл режимде қарулы күштерге жылдам әрі тиімді әрекет ету үшін қосымша өкілеттілік берілген.

Еуропаның бірнеше елі осыған дейін Ресей тарапынан келіп жатқан түрлі қауіпке тап болған еді. ЕО бұны "гибридтік науқан" деп ашық айтып, оған диверсия, маңызды инфрақұрылымға зиян келтіру және маңызды нысандар маңында дрондардың ұшуы кіретінін мәлім етті.

Литва Беларусьті бұдан бұрын да осындай арандатушылық әрекеттер бойынша айыптады. 4 жыл алдында Таяу Шығыстан шыққан мыңдаған заңсыз мигрант Беларусь арқылы Литваға өткен болатын.