Өскемен қаласында жарты жылдан бері жартылай жабық тұрған ең ірі көпір қайтадан толық ашылды, деп хабарлайды 24kz.

Енді бірнеше ай бойы тұрғындарды әуре-сарсаңға салған жол кептелістері жойылып, көлік қозғалысы қалыпқа келді. Көпірдің жартылай жабылуына себеп көпірмен қатарласа орналасқан канализациялық коллекторды жаңарту жұмыстары болды. Инженерлік желілерді жаңғырту үшін өткелдің жарты бөлігі уақытша жабылып, көлік қозғалысы шектелді. Бұл қала тұрғындарына едәуір қолайсыздық тудырып, шағымдар санын арттырған еді. Жобаны іске асырып жатқан мердігер компания жұмысты жеделдетіп, көпірдің барлық жолақтарын мерзімінен бұрын қолданысқа берді. Қазір коллекторды толық жаңарту шаралары жалғасып жатыр, бірақ олар енді өткелдің жұмыс істеуіне кедергі келтірмейді.

Замира Мурсалимова, Өскемен қаласы әкімдігінің баспасөз хатшысы:

- Көлік қозғалысы қалыпқа келсе де, жұмыс жалғасып жатыр. Жөндеу жүргізілген аумақ маңайы абаттандырылады. Канализациялық коллектордың ең басты әрі күрделі тармағы жаңартылды. Енді қалған шаруалар өз уақытымен аяқталады деп ойлаймыз