Қазақстанда 2026 жылға арналған есептік көрсеткіштер бекітілді. Айлық есептік көрсеткіш 4325 теңге, ал ең төменгі күнкөріс деңгейі 50851 теңгеге дейін өседі. Демек өсім – 10 пайыз. Ал ең төменгі жалақы өзгеріссіз қалады. Толығырақ KAZ.NUR.KZ материалынан оқыңыз.
Президент Қасым-Жомарт Тоқаев "2026-2028 жылдарға арналған республикалық бюджет туралы" заңға қол қойды. Заңға сәйкес келесі жылдан бастап айлық есептік көрсеткіш (АЕК) пен ең төменгі күнкөріс деңгейі, сондай-ақ зейнетақы өседі.
2026 жылы есептік көрсеткіштер қалай өзгереді
Президент қол қойған заңға сәйкес, айлық есептік көрсеткіш 3 932 теңгеден 4 325 теңгеге дейін өседі. Бұл жәрдемақылардың, әлеуметтік төлемдердің, айыппұлдардың, салықтардың, мемлекеттік баждар мөлшеріне тікелей әсер етеді.
Заңда ең төменгі күнкөріс деңгейін арттыру да қарастырылған. 2026 жылы ол 50 851 теңгені құрайды. Бұл мүгедектік бойынша жәрдемақыларды, асыраушысынан айырылуы бойынша жәрдемақыларды және басқа да төлемдерді есептеуге негіз болады.
Айта кетерлігі, ең төменгі күнкөріс деңгейі де, айлық есептік көрсеткіш (АЕК) те былтыр 6,5 пайызға өскен, бұл жолы 10 пайызға көтеріледі.
Зейнетақы қалай өседі
Ең төменгі күнкөріс деңгейімен қатар қазақстандықтардың зейнетақысы да 10 пайызға өседі.
Ең төменгі базалық зейнетақы төлемі 2026 жылы 35 596 теңге немесе ең төменгі күнкөріс деңгейінің 70 пайызына тең болады. Ең жоғары көрсеткіш 60 004,18 теңгеге дейін болады немесе ең төменгі күнкөріс деңгейінің 118 пайызына теңеседі.
Ең төменгі зейнетақы мөлшері
Заңда ең төменгі зейнетақы мөлшері де айқындалды, енді ол 69 049 теңге болады.
Бұл көрсеткіш 1998 жылға дейін толық еңбек өтілі бар азаматтар алатын "жас мөлшеріне байланысты зейнетақы" деп те аталатын ынтымақты зейнетақыға да қатысты — әйелдер үшін 20 жыл және ер адамдар үшін 25 жыл. Жұмыс тәжірибесі аз адамдар үшін төлем мөлшері пропорционалды түрде азаяды.
Ал ең төменгі жалақы (ЕТЖ) 2026 жылы өзгеріссіз 85 000 теңге болып қалады. Еске сала кетсек, ол соңғы рет 2024 жылы көтерілген болатын.
Осылайша 2026 жылы барлық есептік көрсеткіш, соның ішінде қазақстандықтардың зейнетақы мөлшері артады. Алайда, өсім ең төменгі жалақыға әсер етпейді, яғни төмен жалақы алатын лауазымдарда жұмыс істейтін азаматтар мен жалақысы осы есептік көрсеткішке байланысты жұмысшылардың табысы өзгермейді.
Мәтіннен қате тапсаңыз, бізге жазыңыз
