ОКҚ алаңындағы баспасөз мәслихатында ҚР әділет вице-министрі Ботагөз Жақселекова елімізде қабылданған «Зияткерлік меншік мәселелері бойынша Қазақстан Республикасының кейбір заңнамалық актілеріне өзгерістер мен толықтырулар енгізу туралы» заңдағы өзгерістер мен жаңашылдықтар бойынша түсініктеме берді.

Оның айтуынша, түзетулердің мақсаты – зияткерлік еңбектің нәтижелері нақты экономикалық активке айналатын құқықтық орта қалыптастыру. Заңның негізгі мақсаттары:

көру қабілеті бұзылған адамдардың жарияланған шығармаларға қолжетімділігін қамтамасыз ету;

тауар белгілерін жедел тіркеуді енгізу;

тауар белгісі ретінде белгі тіркеуге қарсы қарсылық беру мерзімін ұлғайту;

дараландыру құралдары және өнеркәсіптік меншік объектілері бойынша патенттік сенім білдірілген өкілдердің мамандануын енгізу;

тауар белгілерін тіркеуден бас тарту негіздерін нақтылау;

формалды сараптама кезеңінде өнертабыстарға патент беруден бас тарту мүмкіндігін белгілеу.

«Бүгінде онлайн сауда, маркетплейстер белсенді дамып келеді, олар сатушылардан тіркелген тауар белгісінің болуын талап етеді. Алайда өтініштерді қарау мерзімі – 7 ай – бизнес сұранысын қанағаттандырмайды. Мысалы, стартап немесе шағын кәсіпкер үшін нарыққа шығу, көбіне, брендті тіркеу мерзіміне тәуелді. Осыған байланысты Заңда өтініш берушінің қалауы бойынша тауар белгісін 3 ай ішінде жедел тіркеу тетігін енгізу жөніндегі түзетулер көзделген», – деді вице-министр.

Сонымен қатар тауар белгілерінің иелерінің құқықтарын қорғауды күшейту мақсатында тауар белгісі ретінде тіркеуге ұсынылған белгілерге қарсылық білдіру мерзімі 2 айға дейін ұзартылды.

Спикердің айтуынша, бұл түзету Министрліктің адвокаттар мен патенттік сенім білдірілген өкілдердің қарсылық білдіру мерзімін ұзарту туралы сауалдарына жауап болды. Енді бизнес пен кәсіби қауымдастықтың мәлімделген белгілерді талдауға және өз құқықтарын қорғауға көбірек уақыт болады.

«Патенттік сенім білдірілген өкілдердің қызмет сапасын қамтамасыз ету үшін олардың дараландыру құралдары мен патенттеу объектілері бойынша қызметі ажыратылды. Бұл ұсыныстар патенттік сенім білдірілген өкілдерді аттестаттауды және олардың қызметін өз құзыретіне сәйкес объектілер бойынша жүзеге асыруды көздейді. Нақты айтқанда, мамандану енгізіледі: мысалы, бір патенттік өкіл, тауар белгілері мен тауардың шығу жерлерінің атауларына мамандануы мүмкін, ал екіншісі – өнертабыстар мен өнеркәсіптік үлгілерге. Бұл кеңес беру сапасын арттыруға және өтінімдерді сүйемелдеу кезінде қате жіберу қаупін азайтуға мүмкіндік береді», – деп түсіндірді Ботагөз Жақселекова.

Сондай-ақ спикер бұл түзетулер АҚШ, Канада және Ұлыбританияның тәжірибесі негізінде әзірленгенін атап өтті. Осылайша, Министрлік бұл модельдердің озық элементтерін ұлттық жағдайға бейімдеді.