Ақмола облысы Доңғылағаш ауылында ірі қараның неден қырылғаны анықталды, деп хабарлайды өңір әкімдігіне сілтеме жасаған KAZ.NUR.KZ.

Ауыл шаруашылығы министрлігі Ветеринариялық бақылау және қадағалау комитетінің Ақмола облыстық аумақтық инспекциясының басшысы Манат Абдрахмановтың мәліметінше, Зеренді ауданы Қонысбай ауылдық округіне қарасты Доңғылағаш ауылында ірі қара малдың қырылуына қатысты жағдай бақылауда тұр.

Зертханалық тексеріс нәтижелері бойынша жануарлардан аса қауіпті жұқпалы аурулар анықталмаған.

Малдың қырылуына олардың қараусыз жайылып, қоқыс орындарына кіріп, зиянды қалдықтарды жеуі себеп болған.

"Зертханалық талдау кезінде сынамалардан пестицидтер табылды. Диагноз – жем-шөптен улану. Жақын маңдағы ауылдарда жағдай тұрақты, осындай оқиғалар тіркелген жоқ", — делінген хабарламада.

Мәтіннен қате тапсаңыз, бізге жазыңыз