Облыс басшысы Асхат Шахаров жауапты мекеме өкілдеріне фитосанитарлық мониторингті күшейтуді тапсырды, деп хабарлайды 24kz.

Сала мамандары көршілес өңірлермен жедел ақпарат алмасып, зиянкестердің егістіктер мен шабындық алқаптарына өтуіне жол бермеудің шарасын қарастырып жатыр.

Шалқар ауданында 23200 гектар жерді шегіртке жайлаған. Қазір бұл алқаптарда түрлі техниканың көмегімен химиялық өңдеу жұмыстары жүріп жатыр.

Жанболат Жидеханов, Шалқар ауданының әкімі:

- УАЗ көлігімен улау жұмыстары жүргізіліп жатыр. Сонымен қатар бір «Град» автокөлігі бар. Міне, әуежайда тұрмыз. Қазір АН-2 ұшағы келді. Сонымен қатар қосымша екі УАЗ көлігі келді. Жалпы аудан бойынша 92 адам жұмылдырылды.

Биыл көктемгі ауа райының жайлы болуы зиянкестердің ерте шығуына сеп болған. Сондықтан анықтаушылар жер-жерді аралап, шегіркенің ошағын іздеуге кіріскен.

Берікбай Құдайбергенов, Республикалық фитосанитариялық диагностика және болжамдар әдістемелік орталығы басшысы:

- Шалқар ауданы Кішіқұм ауылдық округі мен Қызылорда облысы, Арал ауданы, Қосаман ауылдық округінің шекаралас елдерінде үйірлі шегірткелердің таралуын анықтау мақсатында зерттеу жұмыстарын жүргізгенбіз. Бұл жерлерде ешқандай шегірткенің таралғаны анықталған жоқ.

Облыста шегірткеге қарсы химиялық өңдеуге қажетті аэрозоль генераторлармен жабдықталған 11 арнайы техника, 55 бүріккіш пен 6 АН-2 ұшағы бар. Қазір өңірде улау жұмыстарымен қатар зиянкестердің ошағын анықтау жұмыстары да жүріп жатыр. Жалпы саяқ шегірткемен күреске жергілікті бюджеттен 450 млн теңге бөлінді.

Асылхан Абтиев, ҚР АШМ АӨК мемлекеттік инспекция комитетінің аумақтық инспекция басшысы:

- Қазіргі уақытта облыста қажетті көлемде анықтаушылар бар. Олардың саны 800-ден астам адам бар. Сондықтан ешқандай қазір кедергі, мәселе жоқ. Жұмыс штаттық режимде жүргізіліп жатыр.

Биыл Ақтөбе облысында 513 мың гектарды шегірткеге қарсы өңдеу жоспарланған. Бұл жұмыстар Алға, Әйтеке би, Ырғыз, Қобда мен Мәртөк, Темір мен Байғанин, Ойыл және Шалқар аудандарында жүріп жатыр. Қазіргі таңда 62 мың гектар алқапқа у шашылды.

Авторлары: Мансұр Есқожин, Айбек Даутов