Үкімнің орындалуы екі жылға шегерілді.

Қытайдың бұрынғы спорт министрі Гоу Чжунвэнь өлім жазасына кесілді, деп хабарлайды inbusiness.kz сайты Oxu.Az-ға сілтеме жасап.

Үкімнің орындалуы екі жылға кейінге қалдырылды. Мемлекеттік CCTV телеарнасының хабарлауынша, шенеунік 236 миллион юань көлемінде пара алып, жемқорлық қылмысқа барды деп айыпталды. Бұл – шамамен 33,4 миллион долларға жуық ақша.

Сонымен қатар Гоу Чжунвэньге қызметтік өкілетін асыра пайдаланды деген айып тағылды. Сотпен анықталғандай, шенеунік 2012-2013 жылдары Бейжің вице-мэрі болған кезде бір жобаны сатып алу барысында өз өкілеттігін асыра пайдаланғаны расталған. Бұл мемлекет мүлкіне айтарлықтай зиян келтіріп, мемлекет пен қоғамның мүддесіне нұқсан тигізген.

Гоу Чжунвэнь негізгі жазадан бөлек өмір бойы саяси құқықтарынан айырылды. Оның барлық жеке мүлкі тәркіленіп, мемлекет пайдасына заңсыз табыстары қайтарылды.

Егер қосымша құқықбұзушылықтар анықталмаса және екі жылдық мерзім ішінде тәртіп бұзбаса, өлім жазасы өмір бойына бас бостандығынан айыру жазасына ауыстырылуы мүмкін. Десек те, Гоу Чжунвэньнің жазасы жеңілдемейді, ол өмірінің қалған бөлігін темір торда өткізеді.