Павлодарда 10 тіл меңгерген жас полиглот тұрады. Әсел француз және ағылшын тілінен басқа тілдерді өз бетінше үйренген, деп хабарлайды Павлодар облысының білім басқармасына сілтеме жасаған KAZ.NUR.KZ.

Павлодардағы "Дарынды балаларға арналған №8 мектеп-лицейінің" 11-сынып оқушысы Әсел Абдурахимованың тіл үйренуге деген қызығушылығы бала кезінен бастау алған.

Ол жеті жасында әлем елдерінің астаналарын жатқа айтып, түрлі мәдениет өкілдерімен еркін сөйлесуді армандаған. Тоғыз жасында француз тілін өздігінен меңгеруге кірісіп, 11 жасында алғашқы тіл курсына барған.

Әсел ағылшын тілін 2018 жылдан бері оқып келеді және бүгінде бұл тіл оның күнделікті қарым-қатынас құралына айналған.

Қытай тілін арнайы курстар арқылы үйреніп, қазір өздігінен жалғастырып жатыр. Әсел жақын уақытта халықаралық HSK 3 (B1) емтиханын тапсыруды жоспарлап жүр. Ал өзбек, қазақ, орыс, испан, итальян және жапон (N4) тілдерін әлем мәдениетіне деген қызығушылығының арқасында толықтай өз бетінше меңгерген.

Бүгінде Әсел мына 10 тілде еркін сөйлейді:

Тәжік тілі – ана тілі; Өзбек тілі – C1; Қазақ тілі – C1; Орыс тілі – C1; Ағылшын тілі – C2; Француз тілі – C1; Қытай тілі – B1; Испан тілі – A2; Итальян тілі – A2; Жапон тілі – N4 (A2).

Павлодарлық оқушының ендігі мақсаты – БҰҰ-ның алты ресми тілін соның ішінде араб тілін толық меңгеру.

"Тілдер – мен үшін жаңа мәдениетке ашылатын есік", — дейді ол.

Мектеп әкімшілігі Әселдің еңбекқорлығын, табандылығын және жоғары мақсат қоя білетін қасиетін атап өтті. Оның жетістігі жас буынға шабыт беретін жарқын үлгі дейді олар.

Мәтіннен қате тапсаңыз, бізге жазыңыз