Қазақстан-Қытай шекарасында пилотсыз тасымалды қамтитын "Ақылды кеден" жобасы жүзеге асырылуда.

Премьер-министр Олжас Бектенов биыл 10 айда Қазақстан арқылы транзиттік тасымал көлемі 29 миллион тоннадан асқанын ай"тты, деп хабарлайды inbusiness.kz сайты.

"Мемлекет басшысы Қазақстанды Еуразия кеңістігіндегі басты көлік торабына айналдыру бойынша стратегиялық міндет қойды. Оны іске асыру үшін жүйелі шаралар қабылдануда. Транскаспий халықаралық көлік бағытының өткізу қабілеті ұлғайтылды, шетелдік серіктестермен тарифтік саясат үйлесімді түрде жүргізіліп, жүктерді жеткізу мерзімдері қысқартылды. Автожол инфрақұрылымын транзиттік және халықаралық дәліздерге басымдық бере отырып жаңғырту жұмыстары қолға алынды", – деді Олжас Бектенов.

Контейнерлік тасымал көлемі өскен.

Қазақстан-Қытай шекарасында пилотсыз тасымал мен бірыңғай электрондық декларацияны қамтитын "Ақылды кеден" жобасы жүзеге асырылып жатыр.

"Қабылданған шаралардың нәтижесінде биыл 10 айда Қазақстан арқылы транзиттік тасымал көлемі 29 миллион тоннадан асып, нақты өсім көрсетті. Сонымен қатар транзиттік жүк тасымалы үшін бәсеке күшейіп барады. Осы орайда көлік логистикалық жүйенің қолда бар әлеуетін белсенді түрде кеңейту қажет. Бірінші кезекте халықаралық көлік дәліздері мен өткізу пункттеріндегі процестерді жылдам цифрландыру керек. Жүк жөнелтушілер үшін көлік логистикалық операциялардың жеделдігі, алдын ала болжау мүмкіндігі және цифрлық ашықтығы тасымал бағытын таңдауда негізгі фактор болып табылады", – деп атап өтті Үкімет басшысы.

Осыған байланысты Президент Жолдауы аясында логистикада, оның ішінде Smart Cargo экожүйесі де бар, толықтай цифрлық шешімдер жүзеге асырылуда, деді Премьер-министр.