Министрдің айтуынша, бастапқы уақытта пилотсыз таксиде бәрібір жүргізуші болады.

Үкімет отырысынан кейін өткен баспасөз мәслихатында Көлік министрі Нұрлан Сауранбаев елімізде пилотсыз көлік жобаларының іске асырылу жоспары туралы айтты. Министрдің сөзінше, Қазақстанда жаңа технологияларды кезең-кезеңімен енгізу көзделіп отыр.

Министр алдымен жүк көліктеріне қатысты пилоттық жобаны атап өтті.

"2027 жылы алғашқы пилотсыз жүк көліктерін іске қосу жоспарда бар. Ал пилотсыз такси қызметіне келсек, ол да жоспарда бар. Заң жобасында пилотсыз таксимен бірге аэротакси мәселесін де қарастырғанбыз. Келесі жылы ол құжатты Парламентке енгіземіз. Біз заман көшінен қалмауға, жаңа технологияларды Қазақстан аумағында да қолдануға тырысамыз", – деді Сауранбаев.

Министр пилотсыз такси енгізу кезінде қауіпсіздік мәселесі басты назарда болатынын атап өтті. Сондай-ақ бұл бағытта Қытай тәжірибесінің зерттеліп жатқанын жеткізді. Оның айтуынша, қауіпсіздік талаптары қамтамасыз етілсе, жобаны іске асыруға толық мүмкіндік туады.

Оқи отырыңыз: Қазақстанда 10 миллион теңгеге қандай көлік сатып алуға болады?

Сауранбаев 2027 жылы пилотсыз жүк көліктерін енгізу жоспарланып отырғанына тоқталды. Ол пилотсыз такси қызметінің де болашақта іске асуы мүмкін екенін атап өтті. Әлемнің көптеген қаласында мұндай жүйе қолданыла бастағанын, бірақ белгілі бір шектеулер бар екенін түсіндірді.

Министр Қытайдың Шэньчжэнь қаласында пилотсыз таксилерге рұқсат берілгенін, алайда әзірге олардың ішінде қауіпсіздік мақсатында жүргізуші бірге отыратынын мысалға келтірді. Қазақстанда да дәл осындай кезең-кезеңімен енгізу тәсілі қолданылуы мүмкін екенін айтты. Оның сөзінше, барлық шара жолаушылардың қауіпсіздігін қамтамасыз ету үшін жасалады.