Әйгілі қазақ әншісі Димаш Құдайберген Біріккен Ұлттар Ұйымының Халықаралық көші-қон бойынша ұйымының (IOM) жаһандық ізгі ниет елшісі болып тағайындалды. Бұл туралы мәлімдеме IOM-ның Instagram-дағы парақшасында жарияланды, деп хабарлайды KAZ.NUR.KZ.

"IOM әртіс әрі ізгі қайраткер Димаш Құдайбергенді біздің ұйымның жаңа ізгі ниет елшісі етіп мақтанышпен тағайындады", — делінген хабарламада.

DimashNews порталының жазуынша, бұл тағайындау Димаштың ұзақ жыл бойы қиын жағдайларға тап болған адамдарды қолдау жолындағы адал қызметін білдіреді.

Кеше, 8 желтоқсанда Женевада өткен IOM кеңесінің кезекті сессиясында Димашқа жаһандық ізгі ниет елшісі мәртебесінің символын Халықаралық көші-қон бойынша ұйымының бас директоры Эми Поуп табыстаған.

Ал Димаш ұйымға мүше мемлекеттер делегациялары мен қызметкерлері қатысқан аудитория алдында өзінің S.O.S d’un terrien en détresse атты танымал туындысын орындады.

Сондай-ақ көпшілік алдында қазақ тілінде сөйлеп, IOM-ның жаһандық ізгілік елшісі болу – ең алдымен үлкен жауапкершілік екенін айтты.

"Алайда осы миссия арқылы қауіпсіз көші-қонды қолдай отырып, мейірімділік пен жанашырлықты насихаттап, барлық қауымдастықты біріктіруге үлес қосқым келеді. Әрбір жүрек – бізді жақындастыратын жарық, сол жарық арқылы біз бір үлкен әлемді бірге құрып келеміз.

Тағы да осы зор құрмет үшін алғысымды білдіремін. Мен ХКҰ отбасының бір мүшесі болғанымды мақтан тұтамын және сіздермен бірге осы маңызды жолды әрі қарай жалғастыруға әрқашан дайынмын", — деді Димаш Құдайберген.

Айта кетейік, 2024 жылы Димаш IOM-ның өңірлік ізгілік елшісі болып тағайындалған еді. Ол өзіне тиесілі жаһандық платформа арқылы мигранттардың мәселелеріне қоғам назарын аударып, олардың интеграциясына жәрдемдесіп, сондай-ақ қаражат жинау шараларына қатысып, ұйымның жұмысына қолдау көрсетіп отырған.

Димаш енді жаһандық елші ретінде мигранттардың құқықтары мен мүдделерін қорғауды, қауіпсіз көші-қон туралы қоғамды хабардар етуді жалғастыратынын атап өтті.

"Инклюзивтілік пен тұрақтылық құндылықтарын ілгерілетуге де күш саламын. Сондай-ақ қаражат жинау және төтенше жағдайларға ден қою бағытындағы жұмыстарыңызды да қолдауды жалғастырамын", — деді ол.

Мәтіннен қате тапсаңыз, бізге жазыңыз