«Азамат» теледебат бағдарламасының екінші маусымына іріктеу басталды. Биылғы білім бәйгесіне 106 оқу орнынан 500-ден аса студент қатысуға өтінім білдірді. Олардың ішінен 64 ойыншы таңдалып, 32 команда құрылады. Әрі қарай оқ бойы озық шыққан пікірсайысшылар тележобада бақ сынайды. Бағдарламада 5 млн теңге қаржылай жүлде сарапқа салынады. Бұл жоба 15 жыл үзілістен кейін «Хабар» арнасынан екінші маусым қатарынан көрерменмен қауышады.

Балжан Дәулет, жоба үйлестірушісі:

- Бүгін алғашқы іріктеу Астана қаласынан басталып жатыр. Астана қаласын негізгі орталық қылып алдық. Яғни осы Астана қаласына тек ғана астаналық студенттер емес, Қостанай, СҚО, Қарағанды қаласының студенттері келіп, іріктеуге қатысатын болады. Іріктеу негізгі алты орталықты таңдап алатын болғанбыз. Бүгін Астанадан басталып жатыр. Әрі қарай бізде бес іріктеуіміз бар. Осы бес іріктеу орталықтарын аяқтағаннан кейін тележобаға жолдама алатын болады.

Мейрамбек Талғатұлы, М. Қозыбаев атындағы Солтүстік Қазақстан университетінің студенті:

- Азамат телебағдарламасын мен YouTube-тан көрген болатынмын. Көптеген шығарылымдарын көрдім. Маған өте ұнады және өзім көптеген облыстық, республикалық турнирлердің қатысушысы, жеңімпазы болғандықтан осы «Азамат» телебағдарламасына қатысу керек деген шешім қабылдадым. Менің ойымша, дебат — үлкен бір философия. Дебат өзінің қатысушыларына көптеген мүмкіндіктер бере алады.